ҚР «Әскери қызмет және әскери қызметшілердің мәртебесі туралы» Заңына, ҚР Президентінің 2019 жылғы 13 ақпандағы №840 «Қазақстан Республикасының азаматтарын 2019 жылдың наурыз-маусым және қыркүйек-желтоқсан айларында кезекті мерзімді әскери қызметке шақыру және әскери қызметтің белгіленген мерзімін өткерген мерзімді әскери қызметтегі әскери қызметшілерді запасқа шығарып салу туралы» Жарлығына, ҚР Үкіметінің № 620 қаулысының 123, 124, 126-тармақтарына және ҚР Қорғаныс министрлігінің «ҚР Қарулы Күштерінде әскери-дәрігерлік сараптаманы өткізу Ережесін бекіту туралы» бұйрығына, ҚР Қорғаныс министрінің «Қазақстан Республикасының өзге әскері мен әскери құрылымындарында, Қарулы Күштерде қызмет ететін тұлғалардың денсаулық жағдайының жарамдылығына қойылатын талаптарды бекіту туралы» бұйрығына, сонымен бірге Семей қаласы әкімінің №341 қаулысының 2019 жылдың қыркүйек-желтоқсан айларында жасы он сегізден жиырма жетіге дейінгі ер жынысты азаматтарды мерзімді әскери қызметке шақыруды ұйымдастыру және қамтамасыз ету жөніндегі шаралар туралы қаулысына сәйкес, Семей қаласының Қорғаныс істері жөніндегі басқармасында осы маңызды жұмысқа дайындық басталып кетті. Үстіміздегі жылғы көктемгі мерзімде әскерге шақыру осы жоғарыда көрсетілген қаулылар негізінде наурыз айында басталып, маусым айында толығымен аяқталды. Семей қаласы Қорғаныс істері жөніндегі басқарма ұжымы Шығыс Қазақстан облысының Семей қаласына берілген тапсырмасын ойдағыдай орындап, облыс бойынша көш бастап келеді.
Семей қаласы Қорғаныс істері жөніндегі басқармасында барлық жұмыстар дер кезінде қолға алынып, әскер жасындағы жастардың тізімі рет-ретімен сараптамадан өткізілді. Семей қаласы Қорғаныс істері жөніндегі басқармасының медициналық комиссиясының дәрігер мамандарының көмегімен әскерге шақырылушылар медициналық куәландырудан уақтылы өткізілген болатын. Бүгінде әскер қатарына шақырылған жастар Қазақстан аумағында өздерінің азаматтық борыштарын абыроймен атқаруда. Атап айтқанда Алматы, Тараз, Ақтау, Сарыөзек, Қапшағай, Үшарал елді мекендеріндегі әскери бөлімдерде, ҚР Ұлттық қауіпсіздік комитетінің Шекара әскерлері, Ұлттық ұлан, Мемлекеттік күзет қызметі құрамында өздерінің үлгілі тәртібімен, қандай да болмасын қиындыққа төзе алатын, Отан алдындағы серттеріне берік, шыңдалған жауынгерлер екенін көрсетіп жүр.
Семей қаласының орта мектептері мектеп түлектерімен — бүгінгі таңда ҚР Қарулы Күштері қатарында азаматтық борыштарын өтеп жүрген жауынгерлермен хат алысып тұрады, оларға арналып «Әскерде жүр біздің түлек!» атты бұрыш ашылған, осылайша, жастар арасында ҚР Қарулы Күштерінің имиджін көтеруде айтарлықтай жұмыстар атқарып келеді. Жас жеткіншектермен, әскер қатарына шақырылатын жастармен үгіт-насихат жұмыстары мектеп қабырғасында ойдағыдай жүргізіліп отырғанын баса айту керек. Әсіресе бұл жұмыстар Шәкәрім атындағы мектеп-гимназияда, № №17, 34, 22, 21,39, 41 орта білім беретін мектептерде жақсы жолға қойылған. Олай дейтініміз Семей қаласының әскер қатарына дейінгі жастар арасында өткізіліп келе жатқан оқу-жаттығу ойындары, әскери-патриоттық, спорттық жарыстар, әскери-қолданбалы спорт түрлерінен өткізілетін жарыстар, қазақстандық патриотизмді насихаттауға арналған акциялар мен форумдар жастар арасында кеңінен қолдау табуда. Біздің командаларымыз республикалық деңгейдегі сайыстарға қатысып, бүгінде ең таңдаулы командалар шебінде өздерін көрсетіп отыр.
ҚР Президенті Қасым-Жомарт Тоқаев қатысқан Қарағанды облысы Спасск қаласындағы ҚР Қарулы Күштерінің оқу-жаттығу полигонында өткізілген V Республикалық жастар жиынында Шығыс Қазақстан облысы атынан барған Шәкәрім атындағы мектеп-гимназияның командасы ең таңдаулы команда ретінде өнер көрсетіп, 2-ші жүлделі орынды жеңіп алды. Бұл — нәтижелі атқарылған жұмыстардың, үлкен еңбектің жемісі. Осы орайда әскер қатарына шақырылатын жастарды отансүйгіштікке тәрбиелеп, болашақ сарбаздарды әскер қатарына дайындауға айтарлықтай үлес қосып жүрген алғашқы әскери дайындық пәнінің жетекшілері — Серік Тусупов, Есенгазы Оразбаев, Шопайхан Нукунов, Оразай Кобелеков, Ерсін Тиыштыкбаев, Сәбит Жоломбетов, Нұржан Жакашев, тағы басқа да ұстаздардың елеулі еңбегін атай кеткен жөн деп ойлаймыз. Бүгінгі таңда күзгі әскер қатарына шақырылатын, Отан алдындағы борышын өтеуге міндетті денсаулығы жақсы, он сегіз бен жиырма жеті жас аралығындағы жастарды іріктеу, медициналық тексеруден өткізу жұмыстарын жүргізу науқаны басталғанын хабарлаймыз. Осыған орай әскер қатарына шақырылуға жасы жеткен, денсаулығы мықты жастарды Семей қаласы Қорғаныс істері жөніндегі басқармасында медициналық тексеруден өтуге шақырамыз. Өмірдің бір баспалдағы – әскер қатарында қызмет етіп, өзін-өзі сынайтын уақыт келгенін жас өрендердің естеріне саламыз. Әр нәрсенің өз уақыты бар, әскер қатарында болып, азаматтық борышыңды абыроймен атқарған шағың сенің жарқын болашағыңның бастауы болатынын білуің керек. Сені өз құрдастарың Отан алдындағы борышты өтеу үшін алыс жолдарға шақырып, шыңдалу мектебінен бірге өтуге шақырады.
Семей қаласының Қорғаныс істері жөніндегі басқармасының ұжымы әрбір әскер қатарына шақырылатын азаматтың, шақыру қағазын алысымен, өзінің жеке куәлігінің көшірмесін, білімі туралы құжаты мен мінездемесін, көлік жүргізу куәлігін, амбулаторлық медициналық картасын ала келулері керек екенін естеріне салады.
К.БЕРДИКЕНОВ, Семей қаласы Қорғаныс істері жөніндегі басқармасының қызметкері.
