Театр маусымының ашылуын өнерсүйер қауым асыға күтеді. Өйткені театр — адамға шабыт сыйлайтын ерекше өнер ордасы, шығармашылықтың қайнаған ортасы.
Семейде театр маусымының ашылу салтанатын атап өту игі дәстүрге айналған. Биылғы мереке де «Бір рет және мәңгілік» деген атаумен Абай театрында салтанатты түрде аталып өтіп, тұрғындарға концерттік шоу-бағдарлама ұсынылды.
Акцияның «Бір рет және мәңгілік» деп аталуы кездейсоқ емес: қала тұрғындары үшін үш театр бір уақытта өнер көрсетті. Олардың өнері халық жүрегінен орын алған және мәңгі сақталады.
— Театр актері ретінде мен үшін маусымның ашылуы — үлкен мереке. Бүгін семейліктер театр өнеріне қызығушылықтары жоғары екенін тағы бір дәлелдеді деп ойлаймын. Білім күнімен қатар келген біздің мерекеге де уақыт тауып осында келген адам қарасының көп екенін өздеріңіз де байқаған боларсыздар. Үш театр да үлкен сұранысқа ие және бұл біз үшін қуанышты жағдай, — деді Ф.М. Достоевский атындағы театр актері Александр Сухов.
Биылғы театр маусымының ашылуы Орталық алаңда 2019 жылдың ең танымал әндері қойылған мерекелік флешмобпен басталды. Кез келген қала тұрғыны флешмобқа қатысу мүмкіндіге ие болды. Одан соң театр ғимаратының алдында жергілікті әртістердің қатысуымен концерт өтті. Концерт аяқталғаннан кейін акция театрдың фойесінде жалғасты. Мұнда көрермендер әйгілі қойылымдардың сахналары безендірілген жерлерде кейіпкерлер костюмін киіп естелік суреттерге түсті.
— Театр маусымының ашылуына алғаш рет қатысып отырмын. Бәрі әдемі безендірілген, адамды баурап алады. Мен мұнда келгенде қатты таңғалдым, өйткені мұндай ауқымды мерекені бұрын-соңды көрмеппін. Менің ойымша, жастар мұндай шаралардан шет қалмауы керек,- дейді театрға келген студенттердің бірі Диана Тезекпаева.
Акцияға, негізінен, театр маусымның ашылуын күткен тұрақты көрермендер жиналды. Олар әр жаңа қойылымды асыға күтіп, әртістермен бірге театрдың жетістіктеріне қуанады.
— Театр — менің махаббатым, тіпті бүкіл өмірім десем де болады. Мен бала кезімнен осы күнге дейін театрдың жанкүйерімін, тұрақты көрерменімін. Менің отбасым да өнермен тығыз байланысты. Халықты театрға жиі келуге шақырамын, — дейді көрермен Тамара Береговая.
Театр әртістерінің айтуынша, мұндай ауқымды мерекені өткізудегі жалғыз мақсат – көрермендердің театр өнеріне деген сүйіспеншілігі мен қызығушылығын арттыру.
Айтолқын САМАТОВА, «Семей таңы»{jcomments off}
