Өскемен төрінде «Алтай – түркі әлемінің алтын бесігі» атты дәстүрлі халықаралық ғылыми-практикалық конференция өтті. Осындай атаумен өңірде биыл 5-ші рет өткізілген айтулы шараға Түркия, Франция, Корея, Үндістан елдерінен арнайы келген ғалымдар қатысты.
Жалпы, аймақта 2019-2021 жылдар аралығында археология саласында, Елбасы — ҚР Тұңғыш Президенті Н.Ә.Назарбаевтың «Болашаққа бағдар: рухани жаңғыру» бағдарламасы және «Ұлы даланың жеті қыры» мақаласы аясында қазақ тарихын зерттеу және Қазақстанның мәдени мұрасын кеңінен насихаттау мақсатында, ғылыми-зерттеу жұмыстарын дамыту бағдарламасы қолға алынған.
Алтай — көшпенділердің технологиялық дамуына және түркі әлемінің қалыптасуына негіз болған Еуразия өркениетінің діңгегі. Сондықтан да халықаралық деңгейдегі конференцияның дәстүрлі түрде шығыста өткізілу бекер емес. Жалпы, биыл бағдарлама барысында отандық және шетелдік ғалымдардың қатысуымен қазақ ұлтының мәдениетін, өзіндік ұлттық кодын сақтау мақсатындағы шараларды оңтайлы шешу көзделген. Конференция барысында еліміздің және шетелдік ғалымдар зерттеу жұмыстарының нәтижелерін ортаға салды. Түптеп келгенде, ауқымды шараның діттегені – халықарылық ғылыми қауымдастықты өңірдің археологиялық әлеуетімен таныстыру. Республика бойынша өңірдегі 13 ескерткіш киелі нысанның тізіміне еніп отыр.
Конференция аясында қонақтар назарына ШҚО-да соңғы жылдарда ашылған археологиялық жаңалықтарды паш ететін көрме ұсынылды. Әсіресе меймандарды Елеке сазы және Шілікті қорымдарынан табылған зергерлік бұйымдар мен «Үржар ханшайымы» және «Алтын адам», сондай-ақ қазақтың ұлттық сәндік-қолданбалы өнері туындылары қызықтырды. Елге есімдері мәшһүр суретші Е.Садырбаев пен мүсінші Ю.Костанянцтың жұмыстары қойылған көрмені тамашалауға көпшілік ерекше ынта білдірді.
Конференцияның ашылу салтанатында алғашқы болып сөз алған облыс әкімінің орынбасары Әсем Нүсіпова «Шығыс Қазақстан Елбасы мақаласына алғашқылардың бірі болып белсенділік танытқанын, 2016 жылдан бері жүргізілген ғылыми-зерттеу жұмыстарының нәтижесінде шығыс өңірінде 25000-нан астам артефакт табылғанын, мұндай сенсациялық жаңалықтар ежелгі мәдениетті ғылыми тұрғыда зерттеуге мүмкіндік туғызғанын» атап өтті.
Шара барысында қонақтар назарына Шығыс Қазақстан облысындағы археологиялық зерттеудің нәтижелері турасында жасалған фильмдер ұсынылды. Шетелдік ғалымдардың қатысумен ашық дәрістер оқылды.
ШҚО ақпараттық орталығы{jcomments off}
