2 қыркүйекте өткен ҚР Парламентінің бірлескен мәжілісінде ел Президенті Қасым –Жомарт Тоқаев Қазақстан халқына Мемлекет басшысы ретіндегі «Сындарлы қоғамдық диалог – Қазақстанның тұрақтылығы мен өркендеуінің негізі» атты алғашқы Жолдауын арнады. Қ.Тоқаев халықты әлеуметтік қорғау, экономиканы дамыту, отандық бизнесті қолдау және мемлекетті нығайту мәселелеріне тоқталды. Жолдауда азаматтардың барлық өтініш-тілектерін жедел әрі тиімді қарастыратын «Халық үніне құлақ асатын мемлекет» тұжырымдамасын іске асыру міндетін қойып, аса маңызды мемлекеттік мәселелерді шешуге арналатын талқылау жұмыстарына азаматтық қоғамды тартуға шақырды. Осы мақсатта Ұлттық қоғамдық сенім кеңесі құрылғанын және бұл кеңес ротациялық тәртіппен жұмыс істейтіндігін атап өтті. Қасым-Жомарт Кемелұлы қазақ тілінің мемлекеттік тіл ретіндегі рөлін нақтылап, алдағы уақытта ұлтаралық қатынас тіліне айналатынын жеткізді. Жолдаудағы тағы бір құптарлық жағдай, Мемлекет басшысы Үкіметке жыл соңына дейін азаматтардың зейнетақы жинағаның бір бөлігін мақсатты түрде пайдалануға мүмкіндік беру, мысалы баспана сатып алу немесе білім алу үшін жұмсау мәселесін жыл соңына дейін пысықтауды тапсырды. Сондай-ақ жердің шетелдіктерге ешқашан сатылмайтыны халықтың көңілінен шығып отыр. Президент тапсырмасы бойынша, алдағы уақытта да мүмкіндігі шектеулі адамдарға қамқорлық көрсету, шағын және орта бизнеске қолдау жасау жалғаса бермек. Сондай-ақ Қ.Тоқаев бағаны жөнсіз өсіруге тыйым салып, адам саудасы мен жыныстық зорлық-зомбылыққа, балаларға қатысты қылмыстарға қолданылатын жазаны шұғыл түрде қатайтуды тапсырды. Жолдауда атап көрсетілген тағы бір жағымды жаңалық — мемлекетті басқару «Күшті Президент – ықпалды Парламент — есеп беретін Үкімет» формуласы бойынша жүзеге асатындығы. Бұл формула бойынша халық жергілікті билік жұмысын тікелей бағалай алады. Сауалнама және онлайн дауыс беру арқылы тұрғындардың 30 пайызынан астамы қала немесе ауыл әкімінің жұмысын тиімсіз деп есептесе, бұл арнайы комиссия құрып, туындаған мәселені зерттеуге және тиісті ұсыным енгізуге негіз бола алады.
Жолдауда айтылған ұсыныстар мен тапсырмалар Мемлекет басшысының елді толғандырып отырған мәселелерді жақсы білетінін дәлелдеді. Жолдаудан туындайтын тапсырмалар елімізде алдағы уақытта атқарылатын жұмыстардың жоспарына енгізіліп, іс жүзіне асады деп сенеміз.
Е.ҚҰТТЫБАЕВ,
Тарбағатай аудандық мәслихатының депутаты,
азаматтық қоғам өкілі.{jcomments off}
