2 қыркүйек күні Мемлекет басшысы Қасым-Жомарт Кемелұлы Тоқаев Қазақстан халқына алғашқы Жолдауын жариялады. Өз қызметінде әрқашан да ашықтық принципін ұстанатын Қасым-Жомарт Кемелұлы Тоқаев Жолдауында бүгінгі таңдағы саяси, әлеуметтік-экономикалық және рухани саладағы өзекті мәселелерді нақты анықтап, оларды тиімді шешу жолдарын белгілеп, қоғамның жаңа даму кезеңіндегі бағыт-бағдарларын негіздеп берді. Ел Президенті Қазақстан халқына арнаған алғашқы Жолдауында қоғам өмірінің негізі болып табылатын экономикалық, әлеуметтік, саяси және мәдени-рухани салаларындағы өзекті мәселелерді толығымен қамтып отыр. Қоғамда қордаланып қалған мәселелерді шешуге қатысты алғашқы бастамалар мен міндеттер Президенттің сайлауалды бағдарламасы мен ұлықтау рәсімінде ұсынған он басым бағытында атап көрсетілген болатын. Ал Жолдауында Үкімет алдында тұрған ортақ міндет ретінде азаматтардың барлық сұраныстарына тез жауап беретін «еститін» мемлекет қалыптастыру, кез келген шиеленісті тек бейбіт жолмен, диалог арқылы үйлесімді шеше алатындай мемлекет құру қажет екендігін айтты. Сондай-ақ осы тұста Президент Үкіметке азаматтардың құқығын қорғауға баса назар аударуды тапсыра отырып, сот жүйесі мен құқық қорғау жүйесін терең реформалау, сыбайлас жемқорлыққа қарсы күресті жүйелі түрде жүргізу қажеттігіне тоқталды.
Алдағы еліміздегі елеулі оқиғалар, соның ішінде әл-Фарабидің 1150 жылдығы, Абайдың 175 жылдық мерейтойы, маңызды мерекеміз Тәуелсіздіктің 30 жылдығына байланысты атқарылатын іс-шаралар нағыз отаншыл жас ұрпақты тәрбиелеуге бағытталуы керек.
Үкімет заңнаманы 5G, «Ақылды қала», «Үлкен деректер», блокчейн, цифрлық активтер, жаңа цифрлық қаржылық құралдар сияқты тың технологиялық құбылыстарға бейімдеу қажеттігі айтылды. Сондай-ақ Президент ауылда сапалы өмір сүру шарттарын қамтамасыз ету қажеттігіне көңіл бөлген. Осыған орай Елбасының «Ауыл – Ел бесігі» арнайы жобасын жүзеге асыруды жалғастыруды тапсырды. Қазіргі салық жүйесінің сапасын арттыру да жеке мәселе ретінде қаралып, оны жетілдіру бойынша Ұлттық банкке арнайы тапсырма берілді.
Мемлекет басшысы қазіргі жаһандану дәуірінде адам капиталына, білім саласына қойылатын талаптардың жаңа деңгейге көтерілуіне байланысты сапалы білім алу қарқынды дамудың басты шартына айналатынын баса көрсетті. Бұл өз кезегінде ЖОО-ға жаңа міндеттер жүктейді.
Ұлттың дамуын қамтамасыз етудің негізгі кепілі ретінде ғылымға ерекше мән берілетін болады. Қ.Кемелұлы отандық ғылымды дамытуда ЖОО-ның алатын орнына тоқталды.
Мемлекет басшысының алғашқы Жолдауы еліміздің қоғамдық-саяси, әлеуметтік жаңғыруының жаңа кезеңінің басталғанын айқын көрсетіп отыр.
Жолдауда айтылғандай, заманауи тиімді мемлекет құру үшін азаматтық жауапкершілігімізді арттырып, ел игілігі жолында бірлесе еңбек етейік.
О.ЖОЛЫМБАЕВ, ф.-м.ғ.к., доцент,
Семей қаласының Шәкәрім атындағы мемлекеттік университеті.{jcomments off}
