Бүгінгі таңда Семей қалалық ішкі саясат бөлімінің Діни бірлестіктермен байланыс жөніндегі секторының мамандары жергілікті жұртшылық арасында түрлі іс-шаралар ұйымдастырып, деструктивтік діни ұйымдарға тән белгілер, сондай-ақ олардың заңсыз миссионерлік жұмыстарының салдары және дәстүрлі діндердің оларға деген көзқарастары, аймақтағы және елдегі экстремизм және терроризмнің алдын алу жұмыстары туралы кең көлемде ақпарат беруде.
Қала көлемінде өткізіліп жатқан мұндай жиындар барысында Қазақстан Республикасында діни экстремизм және терроризмге қарсы іс-қимыл жөніндегі 2018-2022 жылдарға арналған мемлекеттік бағдарламаның негізгі мақсаты, яғни діни экстремизмнің зорлық-зомбылық көріністерінен және терроризм қауіптерінен адамның, қоғамның және мемлекеттің қауіпсіздігін қамтамасыз ету туралы айтылып, түсіндірме жұмыстары жүргізілуде.
Басқосулар барысында, негізінен, Қазақстанның дін саласындағы мемлекеттік саясаты, заманауи ақпараттық технологиялардың қоғамдық өмірдегі орны, ұлттық қауіпсіздік, діни сауаттылық, азаматтық қоғам институттарының белсенділігі жайында да сөз болып, кеңінен талқылануда. Айталық, мамандар радикалды көзқарастағы деструктивті ұйымдар тарапынан жүргізіліп жатқан астыртын жұмыстар шынайы діннің қағидалары мен ұстанымдарына толығымен қайшы келетіндігі және мұндай ұйымдардың әрекеттері дінге, діндарлар қауымына және жалпы адамзатқа қарсы жүргізіліп жатқан қылмыс ретінде бағаланатындығын айтып, діни сауаттылықты арттыруға шақыруда.
Жалпы, бүгінгі таңда әлеуметтік желілердегі жеке парақшалар арқылы діни экстремизмнің алдын алу мақсатында сенім телефондары да жариялануда. Атап айтсақ, Семей қаласының ішкі саясат бөлімінің діни бірлестіктермен байланыс жөніндегі секторы Whatsap желісі арқылы қала тұрғындары үшін діни тақырыптардағы сұрақтарға жауап алу мүмкіндігін жасап отыр. Арнайы байланыс телефондары арқылы семейлік азаматтар жат пиғылды діни ағымдар мен олардың әрекетінен сақтану үшін және діни экстремизм мен радикализмнің алдын алуға үлесін қосу мақсатында арнайы мамандарға кез келген уақытта сұрақтарын қойып, ой-пікірлерін айтып, тұшымды жауаптар мен кеңестер ала алады.
Семей қалалық ішкі саясат бөлімінің мамандары қала халқының құқықтық сауаттылығын арттыру, ҚР «Діни қызмет және діни бірлестіктер» туралы заңнамасында көрсетілген құқық бұзушылықтардың алдын алу мақсатында шаһар аумағындағы саяжай алаптарындағы тұрғындармен, азық-түлік дүкендерінің сатушыларымен, осынау аумақтардағы дәріхана фармацевтерімен әңгімелесулер өткізді. Бөлім мамандары еліміздің Ата Заңында көрсетілген зайырлылық туралы заң талаптары және дәстүрлі құндылықтарымыз жайлы айта келіп, дәстүрлі дін мен теріс діни ағымдар арасындағы айырмашылықтарды түсіндіріп, бұл тұрғыда азаматтарға ескеруге тиісті жайттарды баяндап берді.
Аталған шара аясында саяжай алабындағы сауда нүктелерінде шұғыл желі телефондарының нөмірлері жазылған кітапшалар мен деструктивті діни ағымдардан сақтандыру мақсатында жаднамалар таратылды. Парақшаларда ҚР Әкімшілік және құқықтық кодексінде атап көрсетілген құқық бұзушылықтар үшін жауапкершіліктер туралы да жазылған.
Аталмыш шара барысында тұрғындар тарапынан қойылған түрлі сауалдарға жауаптар берілді.
Аймағымыздағы конфессияаралық келісімді нығайту, діни экстремизм мен терроризмнің алдын алу, дәстүрлі ислам құндылықтарын насихаттау мен тұрғындардың діни сауаттылығын арттыру жұмыстары қала көлемінде қарқынды жүргізілуде.
Әлібек КЕМЕЛХАН, «Семей таңы»
{jcomments off}
