Кеше, 26 қыркүйек күні М.О.Әуезов атындағы педагогикалық колледжде «Еңбек» нәтижелі жұмыспен қамту және жаппай кәсіпкерлікті дамыту бағдарламасы аясында Түркістан облысынан келген делегаттар «Серпін» бағдарламасы арқылы аталған оқу орнында білім алып жатқан жастармен жүздесті. Кездесуге Түркістан облыстық Қазақстан халқы Ассамблеясы төрағасының орынбасары Ғани Рысбеков, ҚР білім саласының құрметті қызметкері, журналист, өлкетанушы Өмір Шыныбекұлы, қала әкімінің орынбасары Айдар Садырбаев, колледж директоры Шаған Жанаева және студенттер қатысты.
Кездесудің мақсаты – «Серпін» бағдарламасы арқылы Түркістан облысынан келіп оқып жатқан жастармен жүздесіп, сұхбаттасу, хал-жағдайларын білу.
Қала әкімінің орынбасары Айдар Садырбаев М.Әуезов атындағы колледждің еліміздегі алдыңғы қатарлы оқу орындарының бірі екенін, Алаштың талай ардақтылары осы қара шаңырақта білім алып, ұстаздық еткенін қысқаша айтып өтті.
Кездесуде сөз алған Түркістан облыстық Қазақстан халқы Ассамблеясы төрағасының орынбасары Ғани Рысбеков Елбасының «Мәңгілік ел» идеясынан туындаған «Серпін» бағдарламасының негізгі мақсаты жұмыс күші жетіспейтін солтүстік және шығыс облыстарға оңтүстік халқын қоныстандыру екенін тілге тиек етті. Серпіндік студенттерді осы облыста қалып, жұмысқа орналасуға шақырды.
— Оңтүстікте адам саны көп екенін өздеріңіз де білесіздер. Жұмыс орындары да тапшы. Бізде жастардың қызметке орналасуы көп қиыншылықтар туғызады. Ал шығыс пен солтүстікте, керісінше, мамандар жетіспейді. Сондықтан осында қалып, қызметке тұруға тырысу керек. Жалпы, жастар кез келген ортаға оңай сіңіп кетеді. «Серпін» бағдарламасының шарты бойынша, студент білім алған өңірде үш жыл жұмыс істеуге тиіс, — дейді Ғ.Рысбеков.
Мұғалім әрі журналист Өмір Шыныбекұлы да осы пікірді қуаттайды. Оның айтуынша, жұмыссыздық белең алған жерде парақорлық пен қылмыс оқиғалары көбейеді.
— Біз Солтүстік Қазақстан, Қостанай, Ақмола облыстарын аралап келеміз. Сонда білгеніміз — кезінде Солтүстік Қазақстанға қоныстандырылған өзге ұлт өкілдерінің тарихи атамекеніне қайтуы себебінен 2000 жылдан бері 290 мектеп, 100-ден астам елді мекендер жабылыпты. Ал оңтүстікте, өздеріңізге мәлім, адам саны жылдан-жылға артып келеді. Бір бос жұмыс орнына жиырма бес адам үміткер. Мұндай ортада парақорлық пен қылмыс оқиғалары көп орын алып жатады. Сондықтан жастардың көбі базарға шығуға мәжбүр. Ал шығыста жағдай басқаша. Жұмыс орындары жеткілікті, — деген Ө.Шыныбекұлы Шығыс Қазақстан халқының Арыстағы апаттан зардап шеккен халыққа үлкен көмек көрсеткенін де атап өтті. Сонымен қатар студенттерді өздерін жаңа ортада лайықты ұстап, сапалы білім алуға шақырды.{jcomments off}
— Құрметті ұстаздар, біздің студенттер бойынан қандай да бір оғаш қылық байқасаңыздар, үрке қарамаңыздар. Бұған оңтүстіктегі бәсекелестіктің де әсері барын ескеріп, ақылмен түсіндіргейсіздер, — деп өтініш білдірді ұстаз Ө.Шыныбекұлы.
Колледж директоры Шаған Алдамжарқызы серпіндік студенттерге қолдау көрсетуге әр кез дайын екендерін айтты.
— Біздегі күннің суығына, қыстың қаталдығына әлі-ақ үйреніп кетесіздер. Сіздерден өтінерім — психологиялық шектеулерден арылып, өздеріңізді еркін ұстаңыздар. Қоғамдық жұмыстарға белсене араласыңыздар, — деді Ш.Жанаева.
Кездесу соңында студенттер сауалдарын қойып, жауаптар алды.
Айта кетейік, бүгінде Шығыс Қазақстанда 3000-нан астам студент «Серпін – 2050» «Мәңгілік ел жастары – индустрияға» бағдарламасы арқылы білім алуда.
Жадыра ТӨЛЕГЕНҚЫЗЫ, «Семей таңы»
