30 қыркүйек күні Абай кітап-ханасында Шығыс Қазақстан облыстық Қоғамдық кеңесінің отырысы өтті. Отырысқа қала әкімі Ермак Сәлімов, мәслихат хатшысы Бейсенбек Ақжалов, «ШҚО талдау және болжау институты» ЖШС директоры Олег Чернышев, «Атамекен» кәсіпкерлер палатасының ШҚО филиалы жанындағы Іскер әйелдер өңірлік кеңесінің төрайымы, «Шығыс — адалдық алаңы» жобалық кеңсесінің жетекшісі Елена Березинская-Абилова және Семей қаласының Қоғамдық кеңес мүшелері қатысты.
«ШҚО талдау және болжау институты» ЖШС директоры Олег Чернышев Қоғамдық кеңестің жалпы міндеттері туралы айта келе, Семей қаласындағы Қоғамдық кеңестің атқарып жатқан жұмыстары жайлы ақпарат аз екенін жеткізді.
— Қоғамдық кеңес жергілікті жердегі маңызды орган болып табылады. Мәслихат депутаттары, «Нұр Отан» партиясы, «Шығыс – адалдық алаңы» жобасы мен Қоғамдық кеңестің атқаратын қызметтері, көтеретін проблемалары ұқсас болғанымен, Қоғамдық кеңес соның ішінде ең негізгісі болуы керек. Қазір министрлікте Қоғамдық кеңес туралы заң жобасы қаралуда, — дейді О.Чернышев. – Семей қаласындағы Қоғамдық кеңестің атқарып жатқан жұмыстары жайлы ақпарат аз. Әлеуметтік желілер мен бұқаралық ақпарат құралдары арқылы насихаттау керек.
Қоғамдық кеңес мүшелері қалалық білім бөлімімен бірлесе бірқатар жұмыстар атқарылғанын жеткізді. Мәселен, жаңа оқу жылы қарсаңында оқу орындарының жатақханалары тексеріліп, қысқа дайындық жұмыстары жанданғанын, кәсіпкерлермен бірлесе отырып «Мектепке жол» акциясының ұйымдастырылғанын айтты.
Елена Березинская-Абилованың айтуынша, «Шығыс — адалдық алаңы» жобалық кеңсесі аймағымызда 2018 жылдың қараша айынан жұмыс істейді. Негізгі мақсаты – тұрмыстық жемқорлықты жою. Аталмыш жоба медициналық қызмет көрсету, білім беру, архитектура және құрылыс, жер қатынастары бөлімі, мемлекеттік кірістер басқармасы секілді мемлекеттік органдардағы сыбайлас жемқорлық фактілеріне байланысты азаматтардан ұсыныстар қабылдайды.
Сонымен қатар Елена Николаевна «Іскер әйелдер» өңірлік кеңесі жұмысы туралы да баяндады. Оның айтуынша, аталмыш кеңес республика көлемінде алдыңғы қатардан көрініп жүр.
— Іскер әйелдер кеңесінің мақсаты — кәсіпкер әйелдердің белсенділігін ынталандырып, әйелдер арасында кәсіпкерлікті дамыту, олардың нарықтағы бәсекеге қабілеттілігін арттыру. ШҚО-дағы іскер әйелдер қауымдастығы республика кеңселері арасында атқарған қызметі жөнінен үшінші орында тұр. Өткен жылы біздің кеңсе «Nur Otan» партиясының ШҚО филиалынан 1 млн. теңге ұтып алды. Әйелдер қауымы мен студенттерге кеңес беру шараларын жиі ұйымдастырып тұрамыз,- дейді Е.Березинская-Абилова.
Жадыра ТӨЛЕГЕНҚЫЗЫ, «Семей таңы»
{jcomments off}
