Өткен жұмада Шәкәрім университетінде, Ұстаздар күніне және оқу орнының 85 жылдығына орай, «Ұлағатты ұстаз тағылымы» атты мерекелік кеш өтті. Кешке аты аңызға айналған «Айгүл» ансамблі, педагогика ғылымдарының докторы, профессор, Абылай хан атындағы ҚазХҚ және ӘТУ-дің педагогика және психология кафедрасының меңгерушісі С.Ұзақбаева, университет оқытушылары және студенттер қатысты.
Семей қаласының Шәкәрім атындағы мемлекеттік университетінде Ұстаздар күні қарсаңында «Айгүл» ансамблінің қатысуымен өткен «Ұлағатты ұстаз тағылымы» атты мерекелік кештің мақсаты — «Рухани жаңғыру» бағдарламасынан туындайтын «Туған жер», «Жаныңда жүр жақсы адам» ұлттық идеясы аясында Қазақстандағы ғылым мен білімді дамытуға үлес қосып жүрген жандарды қоғамға таныту, қазақ аруларынан құралған алғашқы топ — «Айгүл» вокалды-аспаптық ансамблінің шығармашылығын насихаттап, ұлт өнерінің дамуына үлкен үлес қосқан өнерпаздар өмірін жастарға үлгі ету.
Кеш барысында педагогика ғылымдарының докторы, профессор, Ресей халықаралық педагогика ғылымдары академиясының (МАНПО) және Қазақстан педагогика ғылымдары академиясының (АПН) академигі, «Жоғары оқу орнының 2013 жылғы үздік оқытушысы» атағының иегері Сақыпжамал Ұзақбаеваның «Этнопедагогика: оқу-әдістемелік кешені» кітабының тұсауы кесіліп, ұстазға “Шәкәрім медалі”табысталды. Профессор Арап Еспенбетов сөз сөйлеп, Сақыпжамал Асқарқызының ұлағатты өмір жолынан сыр шертті.
Бұл күні кешке жиналған қауым “Айгүл” ансамблі орындағын әсем әндермен сусындады.
Айтолқын САМАТОВА, «Семей таңы»{jcomments off}
