Тағылымды тарихқа көз жүгіртер болсақ, Алтай мен Атырауға дейін ұласып жатқан ұланғайыр атырапты, кең жазиралы дархан даламызды, елімізді, жерімізді найзаның ұшымен, білектің күшімен қорғаған хас батырлар мен шабысқанды сабасына түсіріп, адасқанды жөнге салатын, даудың бетін бері қайтаратын тілі өткір би-шешендеріміз аз болмаған. Сол бабаларымыз армандап кеткен егемендікке бүгінгі ұрпақ қол жеткізіп, осыдан 22 жыл бұрын тәуелсіздіктің таңы атқан еді. Бүгінде егеменді елдің ұрпақтары еркіндікті аңсаған бабалар салған сара жолдан таймай, елдіктің, ерліктің жайын жырлап, еркін көсілуде. Сәрсенбі күні қалалық мәдениет үйінде Халықтық ақындар орталығының ұйымдастыруымен ХVІІ «Тәуелсіздік таңы» атты аймақтық жас ақындар айтысы өтті.
Нұрдәулет КӘКІШЕВ,
«Семей таңы»
Дәстүрлі айтысқа шашасына шаң жұқпаған, от ауызды, орақ тілді 14 жас ақын топқа түсті. Әлішер Нұрабдоллаев пен Мекебай Нұреке айтысты бірінші болып бастаса, одан кейін Манарбек Сатыбалдин мен Жасұлан Мақаев, одан әрі Ерлан Дәулет пен Дәмір Әбенов, Нұрлан Бектібаев пен Қуаныш Нұржанов, Ардабек Ақбабаұлы мен Қуандық Кенжебекұлы, Серік Қуанған мен Назгүл Ыбраева және Рауан Серікхантегі мен Нұржан Жөкеновтер жалғады. Алаштың тарихынан бастап, бүгінгі тәуелсіздік жайын жырлаған арындаған жалынды жас ақындар ұшқыр ойлылықтарын танытты. Әрине, «Жаңылмайтын жақ, сүрінбейтін тұяқ болмайды» дегендей айтыс барысында сөзден жаңылып, тақырыптан сәл ауытқыған жастар да болды. Алайда, алақанын аямай соққан көрерменнің қошеметін арқаланған ақындар бір-бірін төмендетуге жол бермеді. «Болар елдің баласы бірін-бірі батыр дер» дегенді арқау етіп, бір-бірін қолтығынан демеп отырды.
Айтысты тамашалауға еңбектеген баладан еңкейген қартқа дейін көп жиналды. Ал, тартысты айтысқа куә болған қалалық ішкі саясат бөлімі басшысының орынбасары Айдар Садырбаев, қалалық мәдениет үйінің көркемдік жетекшісі Гүлжан Жақсыбайқызы, республикалық айтыстардың жеңімпазы, халықтық ақындар орталығының түлегі Нұржан Өмірбаев сынды қазылар алқасының мүшелері ақындардың бабын бағамдап, әділ бағаларын беріп отырды. Көзі қарақты көрермен, әсіресе, Манарбек пен Жасұланның, Нұрлан мен Қуаныштың, Ерлан мен Дәмірдің айтысын жоғары бағалады. Әділқазылардың берген ұпай саны бо-йынша ақтық сында Манарбек пен Ерлан айтысып, жұртшылықты ұшқыр ойларымен тәнті етті. Көрермендер де ақындардың делебесін қоздырып, атой салып, қошеметтерін аямай, қос құлынын қолдап отырды. Нәтижесінде Моңғолияның Баянөлгей өлкесінің атынан шыққан Ерлан Дәулет сәл басым болып, бас жүлдені қанжығаға байлады. Оған қазақтың қасиетті қара домбырасы сыйға берілді. Ал, бірінші орынды Манарбек Сатыбалдин, екінші орынды Серік Қуанған мен Назгүл Ыбраева жеңіп алса, Нұрлан Бектібаев пен Жасұлан Мақаев және Ардабек Ақбабаұлы үшінші орынға табан тіреді. Өзге де ақындар арнайы жүлдемен марапатталып, баршасына сыйлықтар табыс етілді. Сонымен қатар, дүбірлі доданың тізгінін ұстаған жүргізушілер Біржан Ахмер мен Назерке Қабаева және аталмыш айтыстың өтуіне атсалысқан бірқатар әншілер мақтау қағаздарымен марапатталды. Марапаттау барысында қалалық ішкі саясат бөлімі басшысының орынбасары Айдар Садырбаев сөз алып, тәуелсіздікті жырлаған жастарға шығармашылық жетістік тіледі. Жас ұрпақтың патриоттық сезімдерін арттырып, саналарына салмақты ой салып, жұртты жырымен сусындатқан жалынды жас ақындардың тұлпарларша дүбірлетуі қаймағы бұзылмаған қазақтың төл өнерін дәріптеп, талай ақынды қанаттандырып, шырақтарын жағып отырған халықтық ақындар орталығының ұстаздары Дәмеш Омарбаева мен Серік Молдабековтің еселі еңбектері екенін айта кеткен жөн болар. Жас ақындар жырға қосқандай тұғырлы Тә-уелсіздіктің ғұмыры ұзақ болғай!
