Сенбі, 12 қазан күні қала әкімі Ермак Сәлімов Қарағайлы шағын ауданына барып, тұрғындармен кездесті. Кездесуде тұрғын үй шаруашылығына қатысты бірқатар мәселелер қаралды.
Тұрғындардың өтініші бойынша аталған ауданға бөлім басшыларымен бірге барған Ермак Бидахметұлы оларды алаңдатқан сауалдарға жауап берді. Аудан тұрғындары үйлерге жылу есептеуішін қою, тұрғын үйлерді интернет жүйесімен қамту, домофон жүйесі мен лифт орнату және басқа да мәселелерді көтерді.
Кездесуде тұрғындар үйлердің сапасына қатысты алаңдаушылық білдірді. Айталық, кейбір үйлердің қабырғаларында жарықтар пайда болған. Мердігер мекеме — «Азия Фирма» ЖШС өкілі жарықшақтың пайда болуы температура мен топырақтың ерекшелігіне байланысты туындайтын қалыпты жағдай екенін, ғимарат құрылысына үш жылға кепілдік берілетінін айтып, сұрақтар болған жағдайда мекемеге келуді өтінді. Келісімшартқа сәйкес, мердігер мекеме үш жыл мерзім ішінде жөндеу жұмыстарын тегін жүргізіп береді.
Қарағайлы шағын ауданындағы үйлерде «ақылды домофон» жүйесі орнатылған. Тұрғындар үйде отырып немесе жырақта жүріп подъезді, үйдің маңайын, автотұрақты, балалар ойын алаңын бақылай алады. Бірақ тұрғындардың көбі одан бейхабар болып шықты. «Спутник» компаниясының өкілі бұл қызметтердің ақылы екенін айтып, қалай жұмыс істейтінін түсіндірді.
Сонымен қатар тұрғындар Қарағайлы ықшам ауданына қатынайтын қоғамдық көліктердің аздығын, балалардың мектепке жетуі қиын екенін айтты. Қала әкімі бұл мәселені де қарастыратынын жеткізді.
— Қаладағы барлық бағыттарды тек бір автобуспен қамту мүмкін емес. Бірақ сіздердің өтініштеріңізді қарастырамыз, — деді қала әкімі.
Жаңа аудандағы жаңа тұрғын үйлерде қоғамдық тазалықты, тәртіпті сақтамайтындар да бар. Аталған ауданда полиция бөлімшесі болмағандықтан, ондайларды жазалау қиын. Тұрғындар қала әкіміне осы жағдайды айтты. Қала әкімі бұл мәселені де шешті. Аталған ауданда полиция бөлімшесі ашылады.
— Ел Президенті Семейге келген сапарында Семейді дамытудың 2020-2025 жылдарға арналған кешенді жоспарын әзірлеуді тапсырды. Осы жоспар аясында Қарағайлы шағын ауданы да дамитын болады. Тағы бірнеше мектеп пен балабақша ашылып, тұрғын үй құрылысы артып, халық саны көбейеді. Семейдің ең дамыған ауданы болатын Қарағайлыда барлық жағдайлар жасалады, — деді қала әкімі.
Сонымен қатар кейбір тұрғындар подъездегі жылу жүйесіне әлі көшіп келмеген тұрғындар үшін ақы төлейтінін айтып шағымданды.
Қала әкімінің тапсырмасына сай, бөлім басшылары кездесуден соң тұрғындармен бірге үйлерді аралап, барлық мәселені қарастырды. Коммуналдық шаруашылық меке-мелерінің өкілдері аталған ауданға келіп, тұрғындармен келімшарттар-ға отырады.
Жадыра Төлегенқызы, «Семей таңы»{jcomments off}
