Өткен жұма, 11 қазан күні Қалалық Мәдениет сарайында жұмыспен қамту орталығының ұйымдасты-руымен бос жұмыс орындары жәрмеңкесі өтті. Жәрмеңкеде қала тұрғындарына түрлі мамандықтар бойынша 800-ге тарта бос жұмыс орындары ұсынылды.
Азаматтарға 30-ға жуық қала мекемелері — “Қаражыра” АҚ, Семей машина жасау зауыты, Шығыс Қазақстан ұн-құрама жем комбинаты, Семей цемент зауыты, «Семей Құрылыс материалдары», «Гордорстрой», «Казахцемент», «Daewoo Bus», Прииртышская бройлерлік құс фабрикасы, «Роза» киіз басу комбинаты, «Эйкос», Семей құю-механикалық зауыты және басқа да кәсіпорындардың өкілдері бос жұмыс орындарын ұсынды. Жәрмеңкеге келушілер «Еңбек» нәтижелі жұмыспен қамту және жаппай кәсіпкерлікті дамыту бағдарламасы аясында жұмыспен қамтудың белсенді шараларына жазылды. Биылғы жылы оқу орнын бітірген жас түлектер үшін «Жастар тәжірибесі» бағдарламасы, қысқа мерзімді оқыту курстары, әлеуметтік, қоғамдық жұмыс орындары ұсынылды.
— «Жас кәсіпкер» жобасына қатысуға да өтініштер қабылдап жатырмыз. Бұл жоба аясында жиырма тоғыз жасқа дейінгі жастарға 200 айлық есептік көрсеткіш көлеміндегі қайтарымсыз гранттар бөлінеді. Ол үшін өтініш беруші бизнес-жобасын ұсынып, комиссия мүшелері алдында қорғап шығуы тиіс. Көпбалалы аналарға, аз қамтылған жанұяларға да 200 айлық есептік көрсеткіш көлемінде гранттар қарастырылуда. Биылғы жылы 108 адамға грант бөлініп, толық игерілді, — дейді қалалық Жұмыспен қамту орталығының директоры Тұрсынбек Дүйсенбайұлы.
Жұмыспен қамту орталығының басшысы 2020 жылдың 1 қаңтарынан көпбалалы аналарға берілетін атаулы әлеуметтік көмектің өзгеретіні туралы да айтып өтті. Жаңа жылдан бастап көпбалалы отбасылар, кірістеріне қарамастан, 4 балаға 42500 теңге, 5 балаға 53 мың, 6 балаға 63 мың, 7-ден көп баласы барлар 73500 теңге көлемінде жәрдемақы алатын болады. Егер отбасы кірісі әр жанұя мүшесіне шаққанда күнкөріс деңгейіне жетпесе, атаулы әлеуметтік көмек тағайындалады. Бірақ отбасының еңбекке қабілетті мүшесі ұсынылған жұмыспен қамту шараларынан бас тартса, онда оның отбасы атаулы әлеуметтік көмек алу құқығынан айырылады.
Жәрмеңкеге келушілер өздеріне ыңғайлы жұмысқа орналасуға, қысқа мерзімді оқыту курстарына жазылу мүмкіндігіне ие болды.
Айтолқын САМАТОВА, «Семей таңы»{jcomments off}
