Сейсенбі, 15 қазан күні «Nur Otan» партиясының Семей қалалық филиалында қала әкімі Ермак Сәлімов азаматтарды жеке сұрақтары бойынша қабылдады.
«Nur Otan» партиясы Семей қалалық филиалы төрағасы бұл жолы он үш адамды қабылдап, сауалдарына жауап берді. Тұрғындар әртүрлі әлеуметтік мәселелерді қозғады.
Қабылдауға келген Мақсат Құсатаев қаладағы медициналық қызмет көрсету сапасының төмендігін айтып, дәрігерлердің жетіспеушілігі мәселесін жеткізді.
— Семейде медициналық қызмет көрсету сапасы төмен. Оның үстіне дәрігерлер жетіспейді. Гастроэнтеролог қабылдауына жазылу үшін он күн күттім. Мен жалғыз өзімнің емес, қала тұрғындарының жанайқайын жеткізіп отырмын. Жаңа құрал-жабдықтар алынып жатқанымен, соны игере алатын мамандар аз. Қалалық мәслихат депутаттары, қоғам белсенділері, қалалық әкімдік бірлесе отырып дәрігер тапшылығы мәселесін ретке келтірейік, — деді Мақсат Құсатаев. Азаматтың сауалына жауап берген шаһар басшысы облыстық денсаулық сақтау басқармасының басшысын жуырда Семейге шақырып, халықпен кездесу өткізетінін айтты.
— Бүгін облыстық денсаулық сақтау басқармасы басшысына жолығып, Семейге келуін өтінемін. Халықпен, қоғам белсенділерімен кездесу өткізіп, медициналық қызмет көрсету сапасын талқылайтын болады. Сол кезде сізді де шақырамыз,- деді қала әкімі.
Сонымен қатар қабылдауға келген тұрғын ерлердің зейнетке шығу жасын қысқарту туралы өтінішін де жеткізді.
— Мен өзім Абай ауданының тумасымын. Сынақ аймағында дүниеге келген соң ба, жерлестерімнің көбі зейнет жасына жетпей дүние салды. Сондықтан ерлердің зейнетке шығу жасын қысқарту керек деп ойлаймын,- деді ол.
Бұл сұраққа жауап берген сала маманы Семей ядролық полигонының жоғары радиациялық қаупі бар аймақтарында бес жылдан артық тұрған әйелдер 45 жаста, ерлер 50 жаста зейнетке шығатынын айтты.
Мақсат Серікқалиұлы қала-дағы көмір тапшылығын да қозғады. Оның айтуынша, көмір сататын орындарда қатты отынға кезек қалың.
— Биыл, өткен жылдағыдай емес, көмір кезегі көп болмайды. Біз көмір таситын вагондар санын көбейттік. Бірақ көмір бизнесімен айналысушылардың күніне бірнеше мәрте келуі жағдайды ушықтырып отыр. Сондықтан 72-квартал ауданындағы көмір сататын орынды қала тұрғындары үшін дайындадық,- деді Е.Сәлімов.
Әкім қабылдауына жазылған Сәбит Темірханов та қаладағы медициналық қызмет көрсету сапасына көңілі толмайтынын білдірді. Айтуынша, оның ұлы Сабыр Серіккәрімовке семейлік дәрігерлер үш ай бойы қажетті ем-дом тағайындамаған. Жолдамамен Нұр-Сұлтан қаласына барғанда ғана елордалық дәрігерлер оны шұғыл түрде емдеген. Осыны айтқан Сәбит Темірханов қалалық денсаулық сақтау бөлімінің, медицина қызметкерлерінің сал-ғырттығына наразылық білдірді.
Шаһар басшысы ШҚО Денсаулық сақтау басқармасы басшысының Семей қаласы бойынша орынбасары Гүлнар Шәріповаға Сабыр Серік-кәрімовтің жағдайын бақылауға алуды тапсырды.
Қабылдауға келген көпбалалы ана Марал Жүнісованың Шақаман кентінен үй алуға жәрдесу туралы өтініші де қаралатын болды.
Ермак Бидахметұлы қабыл-дауға келген өзге де тұрғындардың сауалдарын тыңдап, тиісті сала мамандарына тапсырмалар берді.
Жадыра ТӨЛЕГЕНҚЫЗЫ, «Семей таңы»{jcomments off}
