Семей қаласы әкімдігінде ШҚО әкімінің орынбасары Әсем Нүсіпованың, білім басқармасы басшысы Сайрангүл Жұмаділованың, қала әкімінің орынбасары Айдар Садырбаевтың, кәмелетке толмағандардың істері және олардың құқықтарын қорғау жөніндегі комиссия төрағаларының, мемлекеттік мекеме өкілдерінің қатысуымен кәмелетке толмағандардың істері және олардың құқықтарын қорғау жөніндегі облыстық комиссияның отырысы өтті.
Отырыс барысында патронаттық тәрбиедегі балалардың құқықтарын қорғау, мектеп асханаларын жаңғырту, Жастар жылына арналған іс-шаралардың іске асырылуы мәселелері қаралды.
Патронаттық тәрбиедегі балалар бүгінде мемлекет қамқорлығында. Ай сайын бұл санаттағы балалар мен олардың тәрбиешілеріне жәрдемақылар тағайындалып, психологиялық және құқықтық кеңестер беріліп отырады. Дегенмен мәселе де жоқ емес. Айталық, Бесқарағай ауданында патронаттық тәрбиедегі кәмелет жасына жетпеген бала өз-өзіне қол жұмсап, көз жұмған. Әсем Бекқызы отырыс барысында Бесқарағай ауданының білім бөлімінің басшысы Самат Омарғазиннен қайғылы оқиғаның себебін сұрады.
– Қазір тергеу амалдары жүргізілуде. Қылмыстық кодекстің өз-өзіне қол жұмсауға итермелеу туралы 105-бабы бойынша қылмыстық іс қозғалды, — деді С.Омарғазин.
Отырыста қаралған екінші мәселе мектеп асханаларын жаңғырту жүйесіне қатысты болды. Қазіргі күні Өскеменде мектеп асханаларын жаңғырту жобасы жүзеге асырылуда. Конкурсты жеңіп алған кәсіпкерлер өз есебінен мектеп асханаларын жаңғырту және жөндеу жұмыстарын жүргізуде. Он жылға дейін ұзарту құқығымен жеті жылға жалға беріледі.
Мемлекеттік — жекеменшік әріптестігі (МЖӘ) инвестиялық жобасы үшін конкурстық құжаттаманы ШҚО МЖӘ өңірлік орталығы әзірледі. Асханаларды жөндеу жұмыстары мен қажетті жабдықтардың тізбесін мектеп директорлары ұсынды, ал мәзірді әзірлеуге технолог мамандар тартылған. Аз қамтылған отбасылардың балалары үшін ыстық тамақ құны 309 теңгені, қалған оқушылар үшін 350 теңгені құрайды.
Бүгінгі таңда облысымызда 655 мектеп жұмыс істейді. Оның ішінде 48-і Өскемен қаласында. Аталған жобаға Өскемен қаласының 44 мектебі қатысқан, ал қалған төрт мектеп соңғы талаптарға сай жабдықталған.
ШҚО білім басқармасы салалық және экономикалық сараптамадан өткен конкурстық құжаттаманың 44 пакетін әзірледі. Конкурс қорытындысы бойынша 35 мектеп асханасына Өскеменнен 14 жеке серіктес және Павлодардан 1 серіктес анықталып, олармен МЖӘ шарттары жасалды.
Білім басқармасы мамандарының айтуынша, жаңғырту жұмыстары барысында жаңа жабдықтар сатылып алынып, жөндеу жүргізіледі. Мектеп асханаларының эстетикалық келбеті өзгеріп, тамақ сапасы жақсарады.
Келесі жылы Семейдің 44 мектебінде мектеп асханаларын жаңғырту жобасын жүзеге асыру жоспарланып отыр.
Жастар жылында атқарылған шаралар туралы ШҚО Жастар ресурстық орталығының жетекшісі Арайлым Есімбекова баяндады. Баяндамашының айтуынша, бүгінгі күні облыста 264 990 жас бар. Оның ішінде 175 мыңы жұмыс істесе, 6,9 мың жас жұмыссыз деп көрсетілген.
Облыста 20 жастар ресурстық орталығы, 8 ЖОО мен 82 колледж бар. ЖОО бітірген түлектер үшін аудандарда әр оқу орындарының күндері өткізілсе, техникалық білім алатын студенттерді жұмыспен қамтамасыз ету үшін «Қайратты жастар» шарасы өтеді. Шара барысында студенттер зауыттардың ішкі тыныс-тіршілігімен таныса алады. Сонымен қатар жыл сайын «Студенттік көктем» сайысы, бос орындар жәрмеңкесі, түрлі тренингтер мен сайыстар өткізіледі. Бүгінгі күні «Zhas project» жобасының 80%-ы жұмысы істеп тұр. «Jasa» жобасы бойынша 57 жоба үздік деп танылған. «Жас кәсіпкер» жобасына 1300 жас қатысып, екінші кезеңнен өткен 330 жас 505 мың теңгеден грант иегерлері атанып отыр.
Жиын соңында Әсем Бекқызы патронаттық отбасылар мен себепсіз мектепке бармайтын оқушыларға бақылау жасауды күшейту керектігіне назар аударды.
Жадыра ТӨЛЕГЕНҚЫЗЫ, «Семей таңы»{jcomments off}
