Апта сәрсенбісінде Семей қаласындағы Абайдың мемлекеттік қорық-музейінде «Ұлы даланың ұлы есімдері» тақырыбында республикалық ғылыми-тәжірибелік конференция болып өтті. Конференцияға Қазақстанның аса көрнекті тұлғалары музейлерінің қауымдастығы өкілдері келген болатын.
Аталған шара аясында Қазақстанның аса көрнекті тұлғалары музейлерінің қауымдастығы өкілдерінің ұйымдастыруымен «Тарих және Тұлға» тақырыбындағы көрме ашылды. Еліміздің 20 әдеби-мемориалдық музейінен 200 экспонат қойылған көрме екі күн бойы келушілерді қазақ халқының көрнекті тұлғаларының өмірімен таныстырады.
Экспозицияларға Абылай ханның, Ыбырай Алтынсариннің, Сәкен Сейфуллиннің, Мұқағали Мақатаевтың жеке заттары қойылған.
Осы күні музей өміріндегі тағы бір тың жаңалық — «Абай халық жүрегінде» атты көрме залының ашылу рәсімі өтті.
Абай Алаштың ғана емес, адамзаттың Абайы екені сөзсіз. Залдың ашылуы мұражайдың ашылу күнімен тұспа-тұс келіп отыр. Дәл осы күні, 79 жыл бұрын, ұлы ақынның мұражайы өз жұмысын бастаған еді. Шара кезінде музейлер арасында шығармашылық ынтымақтастық туралы меморандумдар жасалды.
Ал конференцияда ұлтымыздың маңдайға біткен бірегей тарихи тұлғаларының төл мәдениетіміз бен әдебиетімізге қосқан сүбелі үлестері мен шығармашылық жолындағы еңбектері және қоғамдық қызметтегі алар орындары жайлы ғылыми-танымдық баяндамалар оқылды.
Конференция барысында Семей қаласы әкімінің орынбасары Айдар Садырбаев, Семей қаласының дене шынықтыру және спорт бөлімінің туризмді дамыту секторының бас маманы Б.Дүйсенбаев, Солтүстік Қазақстан облыстық «Абылай ханның резиденциясы» музей кешенінің директоры А.Садаев, М.Ғабдуллин музейінің басшысы Қ.Мырзабек сөз алып, жылы лебіз білдіріп, өз құттықтауларын жеткізді.
Сонымен қатар Торғай мұражайлар кешенінің басшысы Г.Сәрсекей, І.Жансүгіровтің әдеби музейінің меңгерушісі Н.Жауынбаева, Қостанай облысынан арнайы келген Ы.Алтынсарин мемориалдық музейінің басшысы М.Оспанов, Г.Н.Потанин атындағы Павлодар облыстық тарихи-өлкетану музейінен Д.Опабекова, Түркістан облысы Тарихи-мәдени этнографиялық орталығы директорының орынбасары Т.Акимов, І.Есенберлиннің әдеби музейінің меңгерушісі Ұ.Комбатурова, Ақтөбе облысы Әйтеке би музейінен А.Жалмұханбетов, Павлодардағы Павел Васильевтің музей — үйінен Т.Карешекова және Абай музейі директорының орынбасары М.Қайрамбаева кезегімен баяндама жасап, өздері жүргізген ғылыми бағыттағы зерттеу жұмыстарымен таныстырды.
Конференция соңында жиынның модераторы, Абай музейінің директоры Ж.Әубәкір келген қонақтар мен баяндамашыларға алғысын білдіріп, ризашылығын жеткізді.
Жиын барысында «Қазақстанның аса көрнекті тұлғалары музейлері қауымдастығы» бірлестігінің болашақта атқаратын жұмыстарына орай бірқатар ұсыныстар қарастырылып, ортақ шешімдер нақтыланды.
Сөз соңында айта кетсек, ассоциация құрудағы мақсат барлық әдеби мұражайларды біріктіріп, ортақ мүддеге жұмыс істеу болатын. Бұл еліміздің рухани-мәдени мұрасын байытуға зор үлес қосары анық.
Азамат ЕРСАЙЫН, «Семей таңы»
