16 қазан, сейсенбі күні Жәнібек Кәрменов көшесіндегі 34 «А» үйінің қабырғасына ескерткіш тақта ілінді. Ескерткіш тақтаның ашылу салтанатына әншінің жары Тұрар Тұрсынханова, Ж.Кәрменовтің жан досы — абайтанушы, алаштанушы Тұрсын Жұртбай және зиялы қауым өкілдері мен қала тұрғындары қатысты.
Семей қаласы әкімдігінің шешімімен Ленинград көшесіне 1993 жылы әнші, жазушы, ҚазКСР еңбек сіңірген әртісі Жәнібек Кәрменовтің есімі берілген болатын. Араға жиырма алты жыл салып, әншінің 70 жылдық мерейтойына орай, әншінің атындағы көшеге ескерткіш тақта орнатылды.
— Биыл дәстүрлі әннің дарабозы, әнші, жазушы, өнертанушы Жәнібек Кәрменовтің туғанына 70 жыл толып отыр. Талантты ағамыз небәрі 43 жасында өмірден озған. Талантты өнер иесінің есімін ұлықтау мақсатында биыл еліміздің әр өңірінде түрлі шаралар өткізілуде. Қалалық мәдениет және тілдерді дамыту бөлімінің ұйымдастыруымен бүгін Семейде ескерткіш тақта ашылуда,- дейді қалалық мәдениет және тілдерді дамыту бөлімінің басшысы Назерке Аққожина.
Ескерткіш тақтаны салтанатты ашу рәсімін әншінің жары Тұрар Байменқызы мен жазушы Тұрсын Жұртбай, еңбек ардагері Нәсен Сембаев пен қалалық мәслихат хатшысы Бейсенбек Ақжалов жасап, Жәнібек Кәрменов жайлы жылы естеліктерімен бөлісті.
— Жәнібекті еске алып, ұлықтап жатқан халыққа алғысымыз шексіз. Жәнібектің өмірден озғанына биыл 27 жыл толды. Көзден кетсе де, көңілден кеткен жоқ. «Уақыт – емші» дегенмен, жыл өткен сайын жүрек жарасы ұлғайып келеді. Дегенмен осы күнімізге де шүкір айтамын. Артында екі ұлы мен бір қызы қалды. Олардан тараған үш жиен мен үш немереміз бар, — дейді әншінің жары Тұрар Тұрсынханова.
Ескерткіш тақтаның ашылуынан кейін Жәнібек Кәрменовтің рухына бағышталып ас берілді.
Ал осы күні кешке Абай театрында Жәнібек Кәрменов атындағы «Алаштан ән оздырған» атты республикалық дәстүрлі әншілер фестивалі өтті. Фестивальда Нұр-Сұлтан, Алматы, Қарағанды, Көкшетау, Павлодар, Талдықорған қалаларынан және аймағымыздың барлық аудандарынан келген отыз бір дәстүрлі әнші өнер көрсетті. Олардың арасында ҚР еңбек сіңірген қайраткерлері — Еркін Шүкіман, Гүлмира Сарина, Ерлан Рысқали, Жақсыгелді Кемалов, республикалық дәстүрлі әншілер байқауларының лауреаты Тельман Нұртай, Нұржан Жанпейісов, т.б. әншілер бар.
Айта кетейік, Жәнібек Кәрменов 1949 жылы қазіргі Шығыс Қазақстан, бұрынғы Семей облысының Абай ауданындағы Қарауыл ауылында дүниеге келген. 1996 жылы оның есімі өзінің туған жері Қарауыл ауылындағы музыка мектебіне берілді.
Жадыра ТӨЛЕГЕНҚЫЗЫ, «Семей таңы»{jcomments off}
