ШҚО «Бизнестің жол картасы — 2020» мемлекеттік бағдарламасының жобаларын қолдау бойынша жетекші өңірлер қатарында тұр.
ШҚО кәсіпкерлік және индустриялық-инновациялық даму басқармасының мәліметінше, 2010 жылдан бастап мемлекеттік бағдарлама аясында 161,4 млрд. теңге несие қаражатына 123 жоба қаржыландырылып, төленген субсидиялар көлемі 14,6 млрд. теңгеге жеткен.
Ағымдағы жылы 100 жоба бойынша 5,7 млрд теңгеге келісімшарттар үшін 1 млрд теңгеге субсидия төленді.
Субсидияланған жобалар санына келсек, Өскеменде — 416, Семейде — 254, Алтай ауданында — 95, Глубокое ауданында — 63, Риддер қаласында 61 жоба қамтылды.
– Салалық құрылымда өндіріс, көлік және сақтау, көтерме және бөлшек сауда, ауыл шаруашылығы, орман және балық шаруашылығы, тұрғын үй және тамақтану, денсаулық сақтау және әлеуметтік қызмет көрсету саласындағы жобалар басым, — дейді кәсіпкерлік және индустриялық-инновациялық даму басқармасының басшысы Ержан Шұрманов.
Кепілдендіруге келер болсақ, жалпы сомасы 14 млрд. теңгенің 431 жобасы кепілдендірілді. Кепілдік берілген сома көлемі – 5,8 млрд. теңге.
Ағымдағы жылы 2,2 млрд теңгенің 72 жобасына кепілдік берілді, кепілдік сомасы — 784,1 млн теңге.
Гранттық қолдау кәсіпкерлер үшін маңызды. 2013 жылдан бастап облыста 564,5 млн. теңге сомасында 215 грант берілді. Биыл 173,7 миллион теңгеге 72 грант тағайындалды, оның ішінде жастар, ерекше қажеттілігі бар адамдар және көпбалалы аналар бар. Сондай-ақ кәсіпті енді ғана бастаған 14 мыңнан астам адам бизнес жүргізу негіздері бойынша оқыту және «Бизнес-Кеңесші» және «Бизнес-Өсу» бағыттарында қаржылық емес қолдауға ие болды.
«Бизнестің жол картасы — 2020» бағдарламасы бойынша облыс кәсіпкерлері 1477,5 млрд теңгенің өнімін өндіріп, 4500-ден астам адам жұмыспен қамтылып, қазынаға 57,2 млрд теңге салықтық төлем түсті.
– Жалпы, жаман емес. Субсидиялау көрсеткіші жоғары және кепілдік беру бойынша елімізде екінші орындамыз. Ары қарай да жақсы жұмыс істеуіміз керек. Статистикаға қарасақ, Семей мен Алтай Өскеменнен қалып тұр. Неге? Осыны басшылыққа ала отырып талдау жүргізу қажет. Жұмысты әлі де белсенді жүргізіңіздер, — деп түсіндірді өз сөзінде облыс әкімі Даниал Ахметов.
ШҚО ақпараттық орталығы{jcomments off}
