Семей қаласының әкімі Ермак Сәлімов үстіміздегі жылдың ақпан айында халықпен болған есептік кездесуде көтерілген мәселелер бойынша берілген тапсырмаларының орындалуына көз жеткізу мақсатында Абыралы өңірінде болып қайтты. Жұмыс сапары барысында Ермак Бидахметұлы алдымен Айнабұлақ ауылындағы күрделі жөндеуден өткен әкімшілік ғимаратын көрді.
Аталған нысанның жөндеу жұмыстарына жергілікті қазынадан 7 миллион теңге бөлініп, толықтай игерілген. Бұл жерде ауылдық клуб және фельдшерлік пункт орналасқан. Ғимарат іші жылы, таза, жұмыс істеуге жайлы. Мектепті таза ауыз сумен қамту және шағын балалар орталығын ашу үшін «Семей су» мекемесі құбырларды тарту жұмыстарын жүргізіп жатыр. Қала әкімі мұндағы қысқа дайындық жұмыстарымен танысып, ауыл тұрғындарымен әңгімелесті, ұсыныс-пікірлеріне құлақ салды.
Келесі кезекте Алғабас ауылына барған Ермак Сәлімов жергілікті мектептің үшінші қабатында жүріп жатқан жұмыстардың жай-жапсарына қанығып, қосымша тапсырмалар берді, оқушылармен және ұстаздармен кездесіп, хал-жағдайларын білді. Өткен жылы үшінші қабаты жабық тұрған білім ордасын жөндеу туралы халықтан өтініш түскендіктен, осы мақсатқа 7 миллион теңге бөлінген болатын.
Айта кету керек, Алғабас ауылының тұрғыны көпбалалы ана Қарлығаш Сыздықова қала әкімінің қолдауымен кең баспанаға ие болды.
Қайнар ауылында таза ауыз су мәселесі өзекті болатын. Бүгінде су құбырлары барлық үйлердің аулаларына дейін жеткізіліп берілген, әрі қарай тұрғындар өздері тартуы керек. Атқарылған жұмыстарды көрген қала басшысы Ермак Бидахметұлы бірнеше үйге кіріп, тұрғындармен әңгімелесті. Бұдан кейін осы өңірге қызмет көрсетіп отырған ветеринарлық пункттің жұмысымен танысты.
Ермак Сәлімов ауылдағы мектептің асханасында болып, санитарлық жағдайына назар аударды. Мектеп директоры ауыз суды осы уақытқа дейін пайдаланбай отырғандықтан, оқушыларды ыстық тамақпен қамтуға мүмкіндік болмай отырғанын жеткізді. Қала басшысы таяу арада бұл мәселе де шешілетін айтты.
Тоқтала кетсек, бүгінде ауыл тұрғындары Жұмыспен қамту бағдарламасы бойынша біліктіліктерін арттырып, кәсіптің түрлі бағыттарымен танысуда. Алдағы уақытта мемлекеттен гранттар алуға да мүмкіндік бар.
Қала әкімі жергілікті халықпен кездесіп, ұсыныс-өтініштерін тыңдады. Мәдениет үйі келесі жылы шағын автобуспен қамтамасыз етілетіні де осы сапар барысында айтылды.
Кешкілік ауылды аралап, көшелердің жарықтандырылуын көрген Ермак Бидахметұлы басқа да түйткілді мәселелерді назарына алды.
Бұл өңірге іссапарын қала басшысы Абыралы ауылында жалғастырды. Ермак Бидахметұлы ауылдық мектепте болып, ұстаздар қауымымен жүздесті, білім ошағының материалдық базасымен танысты.
Бұл күні қала басшысы Ақбұлақ ауылына да ат басын тіреді. Мектепті сапалы жылумен қамту үшін 2 миллионнан астам қаржы бөлінген болатын, бүгінде жұмыстар аяқталған. Мектеп бөлмелері жылы.
Жұмыс сапарының соңында қала әкімі ауылдарда халықты тұрақтандырып, тұрғындар санын көбейту қажеттігін атап өтті. Нақты тапсырмалар беріп, аталған ауылдарға қоныс аударушыларға мал ұстауға жер бөлініп, жеңілдетілген пайызбен несие алуға көмектер болатынын, сонымен қатар мемлекет есебінен баспанамен қамту мәселесі де қарастырылатынын жеткізді.
Роллан КЕМЕРБАЕВ, қала әкімінің баспасөз хатшысы{jcomments off}
