Өткен жұма, 25 қазан күні Семейде халыққа қызмет көрсетуге арналған ақпараттық орталық ашылды. Ақпараттық орталықтың ашылу салтанатына қала әкімі Ермак Сәлімов, қалалық әкімдік қызметкерлері және қала тұрғындары қатысты.
ҚР Президенті Қасым-Жомарт Тоқаев «Сындарлы қоғамдық диалог – Қазақстанның тұрақтылығы мен өркендеуінің негізі» атты халыққа Жолдауында халықпен тиімді кері байланыс орнатудың маңыздылығына баса тоқталғаны белгілі.
«Белгілі бір саладағы шешімдердің әділетсіздігіне қатысты жолданатын көптеген шағымдар нақты мемлекеттік органда немесе аймақта күрделі түйткілдер бар екенін көрсетеді. Енді бұл мәселеге дәл осы тұрғыдан қарап, тиісті шешімдер қабылдаған жөн»,- деген еді Мемлекет басшысы.
Президент қойған міндеттерді жүзеге асыру мақсатында аймағымызда облыс әкімі Даниал Ахметовтің бастамасымен нәтижелі жұмыстар жүргізілуде. Соның бір айғағы — Семей қалалық әкімдігінің ғимаратында ашылған ақпараттық орталық. Ақпараттық орталық «бір терезе» қағидатымен жұмыс істейді. Мұнда қалалық әкімдіктің тоғыз бөлімінің — ауыл шаруашылығы, кәсіпкерлік, жер қатынастары, сәулет және құрылыс, тұрғын үй-коммуналдық шаруашылығы және тұрғын үй инспекциясы, жолаушылар көлігі және автомобиль жолдары, экономика және қаржы, ақпараттық технологиялар және мемлекеттік қызметтерді мониторингілеу бөлімдері қызметкерлері халыққа қызмет көрсетуде.
— Облыс әкімі Даниал Кенжетайұлы бізге халықпен байланысты күшейту туралы тапсырма берген болатын. Бүгін сол тапсырма аясында ашылып отырған ақпараттық орталықтың жұмысына сәттілік тілеймін!- деді шаһар басшысы Ермак Сәлімов.
Сыбайлас жемқорлыққа қарсы іс-қимыл ұлттық бюросының ШҚО бойынша департаменті басшысының орынбасары Жігер Байділдин «Ашық әкімдік» жобасы сыбайлас жемқорлыққа қарсы шаралардың ішіндегі маңыздысы екенін айтады.
— Бұл жоба халықтың кедергісіз, ашық түрде өзіне керекті ақпаратын алуға мүмкіндік береді. Кез келген семейлік осында келіп, мемлекеттік қызмет түрлерін, әртүрлі кеңестер ала алады. Әкім де халықты осы фронт-офисте қабылдайды. Бұл халыққа да, билікке де өте тиімді, — дейді Ж.Байділдин.
Тұрғындар Instagram әлеуметтік желісіндегі «qabylday.akimsemey» парақшасына, Whatsapp мобильді қосымшасы арқылы +77084672511 нөміріне сауалдар жолдай алады, сонымен қатар фронт-офистің 52-12-12 байланыс телефоны арқылы хабарласуға да мүмкіндік бар. Барлық сауалдарға жауаптар 10-15 күн аралығында қайтарылады.
Мемлекеттік стандарттар туралы толығырақ білу үшін смартфонға QR-кодтарын оқуға арналған қосымшаны жүктеп, оны офисте ілінген арнайы стендте қолдануға болады.
Ақпараттық орталығы сағат 09.00-18.30 аралығында жұмыс істейді.
Айтолқын САМАТОВА, «Семей таңы»{jcomments off}
