Өткен жұма, 25 қазан күні Қалалық Мәдениет сарайында әлеуметтік қорғау жүйесі қызметкерлері күні аталып өтті. Салтанатты шараға қала әкімінің орынбасары Қанат Әділбаев қатысып, әлеуметтік сала қызметкерлерін марапаттады.
Елімізде Әлеуметтік қызметкерлер күні, Қазақстан Республикасы Президентінің 2011 жылғы 20 қазандағы Жарлығына сәйкес, қазанның соңғы жексенбісінде мерекеленеді. Бүгінгі күні Семейде 800-ге жуық әлеуметтік қызметкер халыққа қызмет көрсетуде.
— Құрметті әлеуметтік сала қызметкерлері, сіздерді төл мерекелеріңізбен шын жүректен құттықтаймын! Сіздер күнделікті тынымсыз еңбектеріңіздің арқасында жаралы жандарға үміт сыйлап, ел алғысына бөленіп отырсыздар. Қоғам мен адамзат алдындағы орасан зор еңбектеріңіз құрметке лайық. Себебі әр мұқтаж жанның қасынан табылып, қолдау көрсетіп, көмектесіп келесіздер. Бүгінгі салтанатты сәтте әлеуметтік сала қызметкерлері мен ардагерлеріне қала әкімі атынан ризашылық білдіремін. Баршаңызға табыс, зор денсаулық, қажымас қайрат, отбасыларыңызға бақыт тілеймін, — деген қала әкімінің орынбасары Қанат Серікханұлы әлеуметтік сала қызметкерлеріне шаһар басшысы Ермак Сәлімовтің алғыс хаттарын табыстады. Қалалық мәслихат хатшысы Бейсенбек Ақжалов та әлеуметтік сала қызметкерлерін құттықтап, ыстық лебізін білдірді.
Бүгінгі күні Семейде екі әлеуметтік қызмет көрсету орталығы жұмыс істейді. Рымжан Тынысова басқаратын Семей арнайы әлеуметтік қызмет көрсету орталығында жүйке жүйесі ауруына шалдыққан және тірек-қимыл қозғалысы бұзылған 400-ден астам бала арнаулы әлеуметтік қызмет түрлерін пайдалануда. Мекемеде 123 әлеуметтік қызметкер жұмыс істейді.
— Әлеуметтік қызметкер – құрметке лайық мамандықтың бірі. Бұл салада үлкен жүректі, өмірді шын сүйетін адамдар ғана жұмыс істей алады. Биыл, міне, сегізінші жыл қатарынан біздің мейрам мемлекеттік деңгейде аталып өтуде. Бұл — әлеуметтік сала қызметкерлері жылына бір рет тынымсыз атқарған адал еңбектері үшін алғыс алатын күн. Еңбегімізді елеп, марапаттап жатқан қала әкіміне, мәслихатқа алғысымызды білдіреміз, — деді Рымжан Тынысова.
Марапаттау рәсімінен соң мерекелік жиынға қатысушылар әлеуметтік сала қызметкерлеріне арналған мерекелік концертті тамашалады.
Жадыра ТӨЛЕГЕНҚЫЗЫ, «Семей таңы»{jcomments off}
