26 қазан, сенбі күні Шәкәрім университетінде оқу ордасының 85 жылдық, Бейнелеу өнері және сызу кафедрасының 50 жылдық мерейтойына орай, «Ғылым. Білім. Өнер» атты шығармашылық көрме ашылды. Көрменің ашылу салтанатына оқу ордасында көркем графика факультетінің деканы қызметін атқарған академик, профессор Ғарифолла Есім, қала әкімінің орынбасары Айдар Садырбаев, «Nur Otan» партиясы Семей қалалық филиалы төрағасының орынбасары Айнұр Арғынбекова, университет ректоры Мейір Ескендіров, кафедра түлектері, арнайы және жалпы орта білім беретін мектеп мұғалімдері және студенттер қатысты.
Шара аясында «Ұлттық мінез: Ұлы дала бояуы» тақырыбында оқытушылар мен студенттердің шығармашылық көрмесі және «Мектепте көркемдік пәндерді оқытудағы қазіргі заман талаптары: тәжірибе, мәселелер және шешімдер» тақырыбында дөңгелек үстел ұйымдастырылды. Көрмені ұйымдастырудағы мақсат — қолданбалы өнерді насихаттап, қоғамда қызығушылықты арттыру; көркем дәстүрді, мәдени және рухани мұраны қолдау, дамыту.
Шәкәрім университетінде өнер факультеті алғаш рет 1969 жылы Семей қаласының Н.К.Крупская атындағы педагогикалық институтының физика-математика факультетінде орта мектептерге сызу және сурет пәндерінің мұғалімдерін дайындайтын бөлім ретінде ашылған болатын. 1973 жылы бөлім көркем графика факультеті мәртебесіне ие болып, құрамында «Сурет», «Кескіндеме» және «Сәндік қолданбалы өнер» атты үш кафедра пайда болды.
Көркем графика факультетінің мұрагері болып саналатын «Бейнелеу өнері және сызу» кафедрасы бүгінгі күні Өнер және спорт факультетінің құрамында. Факультет «Бейнелеу өнері және сызу», «Кәсіптік білім», «Дизайн» және «Музыкалық білім» мамандықтары бойынша мамандар даярлайды.Осы жарты ғасыр ішінде кафедрадан тәлім алған жүздеген дарынды шәкірттер республиканың әр өңірінде жемісті еңбек етуде.
— Бейнелеу өнері – шығармашылық өнердің өте нәзік түрі. Өмірді өнерге айналдыру кез келгеннің қолынан келмейді. Бес жыл осы кафедрада декан болдым. Мұнда талантты жастар өте көп. Оларды қолдап, шығармашылығын халыққа көрсету керек. Қазіргі заманда дизайн, сәулет салалары мамандарына сұраныс өте жоғары. Сондықтан бұл мамандықтың болашағы зор, — дейді профессор Ғарифолла Есім.
Кафедраның ардагер ұстазы Светлана Борисовнаға және Қазақстан Республикасының Дизайнерлер одағының мүшесі, кафедраның ардагер ұстазы, татар өнер мектебінің бейнелеу және сәндік қолданбалы өнер пәнінің оқытушысы Рая Айтмухамедовнаға шара барысында университтетің ең жоғарғы марапаты «Шәкәрім медалі» табысталды.
Кафедраның жас маманы Ақерке Төлеубекқызының бейнелеу өнерінің заманауи технологиясы арқылы орындалған көркемдік қойылымы қойылды.
Оқытушылар мен студенттердің шығармашылық көрмесі келушілерге ерекше әсер қалдырды.
Айтолқын САМАТОВА, «Семей таңы»{jcomments off}
