Апта сәрсенбісі, 29 қазан күні «Nur Otan» партиясының депутаттық фракциясының кеңейтілген отырысы өтті. Жиынға Семей қалалық «Nur Otan» партиясы филиалының төрағасы, Семей қаласының әкімі Ермак Сәлімов, партия фракциясының депутаттары, саяси кеңес мүшелері, партиялық бақылау комиссиясы, жемқорлыққа қарсы Қоғамдық кеңес мүшелері, қала әкімінің орынбасарлары, Семей қаласының әкімдік бөлімдерінің басшылары қатысты.
«Nur Otan» партиясының «Қазақстан – 2021: Бірлік. Тұрақтылық. Жасампаздық» атты сайлауалды бағдарламасының орындалуы және «2016-2020 жылдарға арналған аймақтарды дамыту бағдарламасын іске асыру барысы туралы қала әкімі Ермак Сәлімов баяндады.
— Бүгінгі күні Елбасымыз Нұрсұлтан Әбішұлы Назарбаев бастаған «Nur Otan» партиясы ел сенімін ақтап, мемлекетіміздің, соның ішінде қаламыздың тұрақты дамуына үлес қосып келе жатқан саяси күш болып саналады. Жасампаздықтың арқасында бірлігіміз жарасып, тұрақтылығымыз нығайды. Мемлекет басшысы Қасым-Жомарт Кемелұлы Тоқаев сабақтастықты сақтап, биылғы Жолдауында егемен елді одан әрі дамытудың стратегиялық бағытын айқындады. Семей қаласында соңғы бес жылда экономикалық дамудың оң серпіні байқалады. Мұның барлығы «Nur Otan» партиясы ұсынған стратегиялық міндеттер мен тапсырмаларды лайықты орындап, халықтың тұрмыс сапасын жақсартуға арналған кешенді шараларды іске асыру аясында атқарылып келеді, — деген қала әкімі Ермак Сәлімов 2016-2020 жылдарға арналған аймақтарды дамыту бағдарламасының іске асырылу барысына тоқталды.
Аталған бағдарлама аясында Семейде автокөлік-жегін көпірі жөндеуден өтеді.
— Сарапшылар автокөлік-жегін көпірін апат алдында деп таныды. Жақын арада жобалық-сметалық құжаттарын реттеу басталады. Аталған жоба Семейді дамытудың 2025 жылға дейінгі жоспарына енді. Осыған дейін де біз көпірді жөндеуден өткізу үшін республикалық бюджетке бірнеше рет өтінім бергенбіз. Жөндеу жұмыстарының барлығы 14 млрд теңгені қажет етеді, — деді қала әкімі Ермак Сәлімов.
Мемлекет басшысы Қасым-Жомарт Тоқаев шаһарымызға келген сапарында Семейді дамытудың 2025 жылға дейінгі жоспарын әзірлеп, бағдарлама аясында автомобиль-жегін көпірі мен темір жол көпірін жөндеуден өткізуге де тапсырма берген болатын.
Айта кетейік, биыл Ертіс арқылы өтетін темір жол көпіріне 90 жыл толады. Аталған көпір Түркістан-Сібір магистралінің құрылысы барысында салынып, 1929 жылы пайдалануға берілген. Осы уақыт аралығында көпір бірде-бір рет күрделі жөндеуден өтпеген.
Сонымен қатар қала басшысы кәріз дюкерлерін жөндеуге қаржы бөлінетінін, Ақсай, Ұшақтар, Комсомол кенттеріндегі жаңадан салынған тұрғын үйлерге инфрақұрылым желілері тартылып жатқанын жеткізді.
Семейде Ресей білім беру мекемелерінің тәжірибесі негізінде жаңа мектеп салынады. Қала басшысы бұл туралы да жиында айтып өтті. Оқу ордасы Сочи қаласындағы «Сириус» білім беру орталығының тәжірибесі негізінде салынбақ.
Сочидегі «Сириус» білім беру орталығын Ресей Федерациясының Президенті Владимир Путиннің бастамасымен «Талант және сәттілік» білім қоры құрған. Сондықтан бұл орталық бейресми түрде Путин мектебі деп аталады. «Сириус» білім беру орталығының мақсаты — өнер, спорт, жаратылыстану ғылымдарына ерекше қабілетті және техникалық салада жетістікке жеткен дарынды балаларды ерте бастан анықтап, дамыту және әрі қарай қолдау көрсету. Мұнда балалар тегін саяхаттайды және тегін тұрады. Ресми мәліметтер бойынша, «Сириусқа» ай сайын Ресейдің барлық аймақтарынан 10-17 жас аралығындағы 800-ге жуық оқушы келеді.
Қала мен аймақ басшылығының қызығушылығын тудырған ресейлік әріптестердің тәжірибесі негізінде Семейде инновациялық технологиялар мектебін құру жоспарлануда. Сочидегі білім беру орталығының қызметімен толығырақ танысу үшін жұмыс тобының өкілдері аталған қалаға барып қайтпақ.
— 4 қарашада қала әкімінің орынбасары Айдар Садырбаев, қалалық білім бөлімінің басшысы Наталья Фесенко және облыстың бірқатар мамандары жұмыс сапарымен Сочи қаласына аттанып, мектептің жұмысымен толығырақ танысатын болады. Мектепте білім берудің заманауи технологиялары мен бағдарламалары енгізілген. Біз бұл тәжірибені зерттеп, болашақ инновациялық технологиялар мектебіне енгізгіміз келеді, — деді Ермак Сәлімов.
Жалпы алғанда, таяу жылдары Степной, Шығыс кенті және Қарағайлы ықшам ауданында 3900 орындық төрт мектеп, мемлекеттік-жекеменшік серіктестік аясында 1200 орындық төрт балабақша салу жоспарланған.
Отырыс барысында партиялық бақылау комиссиясының төрағасы Бауыржан Қайрамбаев комиссия қызметін, «Nur Otan» партиясының Семей қалалық мәслихатының депутаты Марат Сандыбаев денсаулық сақтау саласын дамыту туралы сөз қозғады.
Жиын соңында депутаттық фракцияның кеңейтілген отыры-сының шешімі қабылданды.
Жадыра ТӨЛЕГЕНҚЫЗЫ, Семей таңы»{jcomments off}
