Семейде «Nur Otan» партиясының «Менің туым — менің Отаным» патриоттық акциясы басталды. Акцияның басты мақсаты — қоғамдық орындарда, сауда және ойын-сауық орталықтарында, жоғары және орта арнаулы оқу орындарында Мемлекеттік Туды жоғары орналастыру.
«Менің туым — менің Отаным» патриоттық акциясы еліміздің барлық аймақтарында басталды. Сондай акциялардың бірі Семейдегі «Avenuе» сауда ойын-сауық орталығында өтті. Акцияға қала әкімі Ермак Сәлімов, қалалық мәслихат хатшысы Бейсенбек Ақжалов, «Nur Otan» партиясының Семей қалалық филиалы және «Jas Otan» жастар қанаты өкілдері қатысты.
Акция барысында Мемле-кеттік Әнұран шырқалып, көк Туымыз жоғары көтерілді.
— «Менің туым — менің Отаным» акциясының мақсаты – Мемлекеттік Туды кеңінен насихаттап, қоғамдық орындарға ілу, жастарды патриоттық рухта тәрбиелеу. Мемлекеттің Туы – бұл елдің егемендігін айғақтайтын ресми құжат. Сондықтан біз көк байрақты қолдану аумағын кеңейтіп, рәміздерге деген құрметті арттыруымыз қажет. Бұл – біздің ортақ міндетіміз. Бейбіт аспан астындағы еліміздің еңсесі биік, Туымыздың тұғыры берік болсын, дендеріңізге саулық, отбасыларыңызға амандық, бақ-береке тілеймін! — деді қала әкімі Ермак Сәлімов.
— Мен 1990-1991 жылдары Қазақстан Жоғары Кеңесінің депутаты болдым. Мемлекеттік рәміздеріміз Жоғары Кеңесте 1992 жылы қабылданды. Айта кетерлігі, мемлекеттік рәміздерді қабылдау барысында депутаттар арасында біраз айтыс-тартыстар болды. Бірақ Шәкен Ниязбеков ұсынған көк байрағымызды депутаттардың басым көпшілігі қолдады. Соның ішінде мен де болдым. Көк байрағымыз әрқашан осылай биікте желбіресін. Бүгінгі акцияны мен қолдаймын, — деді қалалық ардагерлер кеңесінің төрағасы Амантай Доғалақов.
Тудағы әрбір нышанның өз мән-мағынасы бар. Туымыздың көгілдір түсі бейбітшілікті білдіреді. Бұлтсыз көк аспан барлық халықтарда бейбiтшiлiктiң, тыныштық пен жақсылықтың нышаны болған. Көк түс — түркі халықтары үшін де қасиетті ұғым. Нұрға малынған алтын күн тыныштық пен байлықты, қыран құс билік, айбындылықты бейнелейді.
Дәл осындай патриоттық акциясы Семей қаласының Шәкәрім атындағы мемлекеттік университетінде де өтті.
Айтолқын Саматова, «Семей таңы»{jcomments off}