«Семей-Водоканал» МКК директоры Еркін Сағандықов өткен жұма, 1 қараша күні жур-налистердің қатысуымен баспасөз конференциясын өткізді.
Еуропалық қайта құру және даму банкінің несиелерін қайтару үшін алдағы уақытта су тарифі қымбаттауы мүмкін. Мекеме басшысы журналистермен кездесуінде осыны айтты.
— Биыл 2015 жылдан 2020 жылға дейін бес жыл бойы қолданыста болған тарифтік кезең аяқталды. Компания желтоқсан айында ұзақ мерзімді тарифке және бағаны көтеруге өтініш береді. Тарифтің қаншалықты қымбаттайтыны Антимонополиялық комитеттің мақұлдауына байланысты болады. ЕҚДБ несиелері тариф есебінен төленеді. Қалай болғанда да, халық үшін тариф қатты көтерілмейді, — деді«Семей-Водоканал» МКК директоры Еркін Сағандықов.
Сумен қамтамасыз ету және кәріздік жүйе бойынша ағымдағы жылдың тоғыз айында мекеме тарапынан көрсетілген қызметтердің жалпы кіріс көлемі 1 млрд. 241 млн. 924 мың теңгені құрап отыр. Бұл ретте 153 млн. 557 мың теңге, оның ішінде сумен қамту бойынша 101 млн. теңге, кәріздік жүйе бойынша 52 млн. теңге көлемінде әлі де алынбаған қарыз бар. Жоспарланған шығындармен салыстырғанда нақты шығын мөлшері де артқан. Бұл мекеменің жаңа нысандарға қызмет көрсетуімен байланысты. Салынып жатқан жаңа нысандар бұл тарифтік сметаларға енбеген.
Мекеме басшысының айтуынша, Семейдегі су желілерінің ескіруі Еуропалық қайта құру және даму банкімен келісімшартқа отыруға себеп болған. Қазірдің өзінде су құбырларының 65-70% тозған. Кәсіпорын ең алдымен апатты жағдайда тұрған су құбырларын жаңартуда.
Кездесу барысында Еркін Сағандықов қаладағы сумен жабдықтау желілерін жаңарту жұмыстары жүргізіліп жатқанын жеткізді.
— Дулатов көшесі бойындағы су желілерін жаңарту жұмыстары Еуропалық қайта құру және даму банкінің қаржылау қолдауы арқылы жүзеге асуда. Су құбырларын ауыстыру жұмыстары аяқталды. Жолдың асфальті жөндеу жұмыстарына дейінгі қалпына келтіріледі. Мердігер мекеме жөндеу жұмыстарын жақында аяқтайды. Бірақ негізгі жабындысы ауа райы қолайсыздығына байланысты келесі жылы төселеді, — деді Еркін Сағандықов.
Еркін Сағандықов келер жылы Дулатов көшесімен қиылысатын Шәкәрім даңғылындағы су құбырлары да жаңартылатынын жеткізді. Кәсіпорын басшысының айтуынша жалпы биылғы жылы ЕҚДБ-мен әріптестік аясында төрт жоба жүзеге асып, 500 млн. теңге шамасында қаржы бөлінген. Олар Западный, Котельничый тұйық көшелері және Фрунзе, Дулатова көшелері бойындағы су құбырларын жаңарту жобалары. Алдағы уақытта су құбырларын жаңарту жұмыстары кезең-кезеңмен жалғаса бермек.
Жадыра ТӨЛЕГЕНҚЫЗЫ, «Семей таңы»
{jcomments off}
