Күні кеше ғана қасымызда жүрген Алмас Аманқолұлы Оңдақанов тірі болса, 45 жасқа толар еді.
Курчатов қаласында облыстық стандарттау және сертификаттау басқармасын, облыстық энергетика және коммуналдық шаруашылығын басқарған, облыс әкімі аппаратының басшысы, Зайсан ауданының және Курчатов қаласының әкімі қызметтерін атқарған Алмас Оңдақановты еске алу турнирі өтті. Абай, Бесқарағай, Тарбағатай аудандарынан, Р.Байсейітов атындағы Семей қаржы-экономикалық колледжінен келген, Курчатов қаласының кәсіпорын-мекемелері қызметкерлерінен құрылған — жиыны 14 команда екі күн бойы шағын футболдан сайысқа түсті.
Турнир қорытындысында 1–ші орынды Абай ауданы, 2–ші орынды Курчатов қаласы, 3-ші орынды Тарбағатай ауданы, 4-ші орынды Бесқарағай ауданы командалары иеленді. І орын алған команда Кубок пен медаль және 50000 теңге, ІІ орын Кубок пен медаль және 40000 теңге, ІІІ орын Кубок пен медаль және 30000 теңге және ІV орын алған команда 20000 теңге сыйақымен марапатталды.
Үздік ойын көрсеткен спортшылар — Арнұр Қожабеков — «Үздік қақпашы», Диас Адильбеков — «Үздік шабуылшы», Қуаныш Саин — «Үздік ойыншы», Есхат Нұрбек — «Үздік сұрмерген», Нұржан Рахимов — «Үздік қорғаушы», Әсет Аманкелұлы — «Белсенді қонақ ойыншы» аталымдарымен марапатталып, әрқайсысы естелік сыйлықтар мен 10000 теңге қаржылай сыйлыққа ие болды.
Алмас Аманқолұлының туған-туыстары жарысты ұйымдастыруға себепкер болған демеушілер – Тусупбеков Садвакас Саттарұлына, Құлмағамбетов Сарқытбек Оразұлына, Әзімханов Сләмбек Шәріпұлына, Қасенов Қайрат Амангелдіұлына, Умербаев Елтай Баймағамбетұлына, Курчатов қаласының әкімі Глазинский Алексей Юрьевичке, сыныптас, курстас, қызметтес достары — Қуаныш Умаровқа, Жұлдызбек Тоштыбаевқа, Ерлан Бүркітовке, Думанғазы Арғынғазинге ақ алғыстарын жолдады.
Жарысқа қатысушылар Курчатов қаласының әкімдігіне, әкім аппаратына қарасты бөлімдер қызметкерлеріне ризашылықтарын жеткізе отырып, бұл турнир алдағы жылдары да жалғасын табатынына сенім білдірді.
Ұйымдастыру комитеті{jcomments off}
