13 қараша, сәрсенбі күні Германияның Қазақстандағы Төтенше және Өкілетті Елшісі Тилло Клиннер бастаған делегация ШҚО-ға сапары барысында Семей қаласына келіп, өндірістік нысандарды аралады.
Шетелдік меймандар алдымен шаһардағы «Kondiz» ЖШС кондитерлік фабрикасы мен «СемАз» машина құрастыру зауытында болды. Одан кейін қалалық әкімдікте Тилло Клиннер бастаған неміс делегациясымен кездесу өтті. Кездесу барысында Елші Семей қаласының алдағы жылдарға арналған жоспарымен танысты.
— Бұл менің Семейге алғашқы сапарым. Бүгін қаланың даму жоспарымен танысып шықтым. Шынымды айтсам, таң қалдым. Біздің мұнда келуіміз кездейсоқтық емес. Алдағы уақытта Германия Семеймен экономикалық қарым-қатынас орнатуға ниетті. Бүгін жеңіл өнеркәсіп, машина құрастыру салаларының әлеуетін көрдім. «Kondiz» ЖШС кондитерлік фабрикасының өнімдері шетелдерге де экспортталады екен. «СемАз» ЖШС мекемесімен де әріптестік байланыс орнату жоспарымызда бар. Басқа да салаларда даму байқалады. Компаниялар бір-бірімен ынтымақтастық туралы келіссөздер жүргізіп жатыр,- деді Тилло Клиннер.
— Біздің кеңсе Алматыда орналасқан. Біз әртүрлі неміс компанияларымен жұмыс істейміз, кеңес береміз. Делегацияның Семей қаласына келгеніне қуаныштымыз. Қазақстан мен Германия арасындағы қатынастар жаңа деңгейге көтеріледі деп ойлаймыз,- деді Айсұлу Ниязгұлова.
Қала әкімінің орынбасары Айдар Садырбаев Елшінің қаладағы бірқатар өндірістік нысандарда болғанын және бұл сапар Семей қаласы мен неміс елі арасындағы байланысқа жаңа серпін беретінін айтты.
— Біздің өнімдер республика бойынша сұранысқа ие. Географиялық орналасуы жағынан да Семей инвесторлар үшін тартымды аймақ. Біз инвесторлардың ұсынысын қуана қабылдаймыз және қарастыруға дайынбыз, — деді Айдар Садырбаев.
Делегация одан әрі Павлодар қаласына бармақ.
Жадыра ТӨЛЕГЕНҚЫЗЫ, «Семей таңы»{jcomments off}
