Өткен жексенбі күні қаламызда балалар мен жасөспірімдер, қыздар және ерлер мен әйелдер арасында киокушинкай каратэден қала әкімінің жүлдесіне арналған ІІ Халықаралық біріншілік жалауын көтерді.
Бұл жолы шаршы алаң төріне Қазақстанның әр түкпірінен келген Шығыс жекпе-жегінің қас шеберлері көтеріліп, өзара жүлделі орындарды сарапқа салды. Жарыс жолына шыққандар арасында сонымен қатар көршілес Ресей Федерациясынан келген спортшылар да бар екен. Осылайша, біріншілік барысында жалпы саны 700 спортшы бақ сынады. Сайыстың нәтижесінде бас жүлдені еншілеген каратэшілер, арнайы кубоктармен қатар, дипломдар мен төсбелгілерге ие болды.
— Аталмыш спорт түрінен біріншілікті осымен екінші мәрте қала төрінде ұйымдастырып отырмыз. Биылғы жылы жарыс өз ауқымын кеңейтті. Іргелес Ресей елінен де жекпе-жек өнерінің жас шеберлері келіп қатысуда. Сайыс мейлінше тартысты өрбуде. Барлық спортшылар жоғары даярлықпен келгендерін дәлелдеп отыр. Қатысушылар саны тым көп, 700 адамды құрайды. Сол себептен де біз жарысты екі кезеңге бөлдік. Мәселен, түске дейін балалар өнер көрсетсе, түстен кейін 12 жастан жоғары өрендер жарыс жолына шығуда. Қатысушылар 36 салмақ категориясы бойынша бақ сынауда. Оның 18-і жас ерекшелігіне байланысты сайысқа шығады. Ең кішкентай қатысушы небары 6 жаста болса, ең үлкен спортшының жасы 31-де, — дейді өз сөзінде облыстық Киокушинкай каратэ федерациясының төрағасы Денис Хижняк.
Айта кетерлігі сол, бұл Шығыс жекпе-жегі — каратэ спортының ішіндегі кең таралған түрі. Оған ерік-жігері мықты, рухы мығым, төзімді және айла-тәсілдерді шебер пайдалана білетін, дене қимылы бойынша белсенділігі аса жоғары спортшылар ғана қатыса алады. Спортшы физикалық ерекшелігі арқылы қарсыласынан басым түсіп қана қоймай, өз бойында шыдамдылық, сабырлылық, жеңіске деген жігер тәрізді қасиеттерді шыңдай білуі қажет. Бүгінгі таңда аталған жекпе-жек түрімен 5 мыңнан астам адам тұрақты түрде шұғылданады екен. Ерекшелігі — бұл спорт түрі жас таңдамайды. Гимнастикаға икемі бар кез келген адам киокушинкай каратэсімен айналыса алады.
Халықаралық біріншіліктің ашылу салтанатына қатысқан қала әкімі Ермак Сәлімов барлық спортшыларға сәттілік тілеп, жылы лебізін білдірді.
— Баршаларыңызды киокушинкай каратэ бойынша осымен екінші мәрте өткізіліп отырған халықаралық чемпионаттың ашылуымен құттықтаймын! Біздің елімізде бүгінгі таңда спорт пен дене шынықтыру ісі қарқынды дамып келеді. Мемлекет басшысы өз Жолдауында спорттың бұқаралық сипатын арттыруға айрықша маңыз берді. Биылғы жылы қаламызда мәдени-сауықтыру кешенін ашу көзделіп отыр. Ендеше, біз өзімізде өткізілетін біріншіліктерге бұдан да көп қонақтар шақыра алатын боламыз, — деді Ермак Бидахметұлы.
Сөз соңында айта кетсек, чемпионатта жеңімпаз атанғандар желтоқсан айында Алматы қаласында өтетін ҚР біріншілігінде бақ сынау мүмкіндігіне ие болады. Сонымен қатар алдағы 2020 жылы Нұр-Сұлтан қаласында өтетін әлем чемпионатына да қатыса алады.
Азамат ЕРСАЙЫН, «Семей таңы»{jcomments off}
