Қыстың соңғы күндерінде жауған қар мөлшері тым қалың болғандықтан, күн күрт жылынса, қаладағы кейбір аумақтар аяқ алғысыз көлшікке айналуы мүмкін. Осы жағдайдың алдын алу мақсатында өткен бейсенбі күні қаладағы Найманбаев, Қабанбай батыр сынды орталық көшелер мен орталық базар маңы және Шығыс кентіндегі Пожарное согре саяжайы мен Дальняя кенті сияқты су алу қаупі бар бірқатар аудандарды аралап, жағдаймен танысқан қала әкімі Айбек Кәрімов қысқа мерзім ішінде ұсыныстарын енгізу үшін қалалық төтенше жағдайлар жөніндегі комиссияға тың тапсырмалар жүктеді.
Алдымен, Найманбаев көшесінің жағдайымен танысқан Айбек Мүталапханұлы Қабанбай батыр көшесінің бойымен бағыт алып, ондағы орталық базар маңы мен 72 кварталдың ортасындағы теміржол көпірінің астыңғы жағындағы көктемде көлшік су көп жиналатын жерге барды. Қала әкіміне мамандар бұл жерде неліктен еріген қар суының көлшікке айналатынын түсіндірді. Олардың сөзіне сүйенсек, осы жердегі коллекторға (сұйық зат пен газды шығарып тұратын канал құдықтарының құбыры) әлдекімдер қоқыс толтырып тастағандықтан, құбыр бітеліп қалған. Құзырлы мекемелер мамандарына бұл мәселені тез арада шешуді тапсырған қала әкімі олардың ұйымшылдығы жоқ екендігін, сондықтан, жұмыстың сылбыр жүретіндігін тілге тиек етті.
Қала басшысы бастаған жұмыс тобы бұдан әрі Шығыс кентіндегі Пожарное согре саяжайына ат басын бұрды. Бұл саяжай күре жолдан алыстау орналасқандықтан, көктем кездерінде шалшық судан аяқ алып жүруге жайсыз тиіп, тұрғындардың қала жаққа қарай қатынауы қиындай түсетін көрінеді. Мамандардың айтуынша, мұнда бұрын тек жазғы нұсқадағы саяжайлар ғана бол-ған. Кейіннен бос жатқан жерлерге үй салынып, қоныс аудар-ғандар саны көбейген. Дегенмен, бұл жерде екі бағыттағы су ағу арнасы қарастырылған. Олардың бірі бітеліп қалса, еріген қар суы көлшікке айналатын көрінеді. Ал, автокөлік базары маңындағы су арнасы арқылы осы саяжайдағы көлшік Ертіс өзеніне құйылады екен. Қағаздағы сызба арқылы мән-жайды түсіндірген мамандарға қала басшысы тапсырма күтіп отырмай, осы бастан қауіпті жағдайдың алдын алу шараларын ұйымдастыруды тапсырды.
{jcomments on}Одан кейін Дальняя кентіне ат басын бұрған қала әкімі, аталмыш аудандағы көктемде шалшық су басатын №38 мектептің жанындағы жерлерді, ірі арықтарды көріп шықты. Шығыс кентіндегі Пожарное согре мен Дальняя кентінің тұрғындарынан былтырғы көктемде су басу қаупіне байланысты арыз-шағымдар көп түскен. Тосын жағдай биыл қайталанбас үшін Айбек Кәрімов комиссия мүшелеріне осы мәселелер бойынша жедел жұмыс жасап, екі күннің ішінде тиісті ұсыныстарды әзірлеуді тапсырды. Сонымен бірге, қала әкімі көктемгі су тасқынының алдын алудың бір жолы қала көшелеріндегі қарды дер кезінде шығару екендігін еске салды. Жұмыс сапарының соңында қала басшысы журналистер тобына аталған мәселелер жайында сұхбат берді.
— Былтыр қай аумақтардың тұрғындарынан өтініштер болса, биыл арнайы комиссия мүшелерімен бірге сол жерлерді қарап, бақылап шықтық. Қыстың соңына қарай қардың қалың жауғанын көріп отырсыздар. Ал, мұндай қалың қар қала көшелеріне, әсіресе, жер үйлерге қауіп төндіреді. Сондықтан да, барлық арықтарды бақылап, су тоқтап қалмас үшін бітеліп қалғандарын тазалау қажет. Көктем кезінде қала көшелерінде көлшіген су болып, тұрғындарға қолайсыздық тудырмауы керек. Ал, тағы бір мәселе қаламызда жолаушы тасымалдайтын автобустар санының көптігінде болып тұр. Осы уақытта кейбір көшелердегі жолдар көліктердің көптігінен ойыла бастайды. Сондықтан, қарды тезірек тазалау керек. Кәріз жүйелерін, ондағы қоқыстарды тазарту жұмыстарын жүргізу қажет. Бұл жұмыстарға қаладағы коммуналдық мекемелер толықтай жұмылдырылатын болады. Алайда, бұл тек атқарушы биліктің ғана жұмысы емес, жалпы, тұрғындардың ортақ мәселесі. Осы мәселелерді болдырмау үшін кәсіпкерлер де атсалысуы керек. Мекемелерінің айналасын қардан тазарту жұмыстарын жүргізуді барлық кәсіпкерлерге тапсыратын боламыз. Сонымен қатар, жер үйде тұратын қарттарға, ардагерлерге де көмек көрсетуді қарастыру қажет. Осы жұмыстарға жауапты мамандардың ұсынысы бойынша барлық техникаларды жұмылдырып, мүмкіндіктерді барынша пайдаланатын боламыз, — деді А.Кәрімов.
Тиісті тапсырмаларын алған жауапты мамандар қаладағы тағы да басқа су басу қаупі бар аумақтарды аралап, қауіптің алдын алу үшін тез арада шара қолданатындарын, қысқа мерзім ішінде ұсыныстарын әзірлеп, сол бойынша жүйелі жұмыстар атқаратындықтарын жеткізді.
Нұрдәулет КӘКІШЕВ,
«Семей таңы»
