Семейде 50 отбасы жаңа пәтерге ие болды. 1 желтоқсан — ҚР Тұңғыш Президенті күніне орай қаламызға арнайы жұмыс сапарымен келген облыс әкімі Даниал Ахметов жаңадан бой көтеріп жатқан Қарағайлы ықшам ауданында көпбалалы аналар мен жетім балаларға пәтер кілттерін салтанатты түрде табыстады.
Жаңа баспанаға қоныстанған 50 отбасының 27-сі балалар үйінің түлектері болса, 23-і көпбалалы жанұялар екен.
– Құрметті семейліктер, Сіздерді Қазақстан Республикасының Тұңғыш Президенті күнімен шын жүректен құттықтаймын. Бүгін біз көпбалалы отбасылар мен балалар үйінің түлектеріне Қарағайлы ықшам ауданынан пәтер кілттерін табыстау үшін жиналып отырмыз. Өздеріңіз көріп отырғандай, заманауи Қарағайлы ауданы күн санап өркендеп келеді. Жақында мұнда халықаралық стандарттарға сай мәдени-спорттық кешен есігін айқара ашатын болады. Сіздерді осы тамаша күнмен құттықтаймын. Қоныстарыңыз құтты болсын. Отанымызды сүйейік, ҚР Тұңғыш Президенті Нұрсұлтан Әбішұлы Назарбаевты құрмет тұтайық, — деді облыс әкімі Даниал Ахметов.
Пәтерге ие болған көпбалалы аналардың бірі Гүлжахар Қоныспаева осындай қамқорлығы үшін мемлекетке ризашылығын білдіруде.
— Біз тұрғын үй кезегінде он жылдан бері тұрған едік. Арманымыз орындалып, бүгін, міне, баспаналы болып жатырмыз. Өте қуаныштымын. Балаларым да риза. Өзім алты бала тәрбиелеп отырмын, бұйыртса жетінші сәбиіміздің өмірге келуін күтіп жүрміз. Өз үйің болғанға не жетсін. Барлық қазақстандықтардың басында баспана болса екен деп тілеймін, — дейді лебіз білдірген Г.Қоныспаева.
Аймақ басшысы көпбалалы ана Салтанат Қайырбекова мен балалар үйінің түлегі Берік Қайлыбаевтың пәтерлерінің ішкі әрленуі, құрылыс сапасымен жеке өзі танысып, осынау қуаныштарымен құттықтады. Екі отбасына да теледидар сыйға тартты.
— Мені ерекше қуантатыны, өмірдің қиын шақтарына қарамастан Сіздердің өздеріңізге, елдің, балалардың жарқын болашағына деген сенімдеріңіз. Тағы бір мәрте баршаңызды қоныс тойларыңызбен шын жүректен құттықтаймын! Зор денсаулық, мол бақыт, отбасылық игілік пен барлық жақсылықтарды тілеймін, — деді Даниал Кенжетайұлы.
Осыдан соң облыс басшысы ҚР Тұңғыш Президенті күніне орай Абай театрында ұйымдастырылған салтанатты шараға қатысты.
— Елбасы Нұрсұлтан Әбішұлы Назарбаев ел билігіне келген жылдар ішінде ұмыт болған ұлы тарих қайта оралды. Ұлттық рух жаңғырып, өшкеніміз жанды. Шекара шегенделіп, мемлекеттілігімізді айқындайтын рәміздеріміз, төл теңгеміз, Ата Заң, ұзақ мерзімді стратегиялық құжаттарымыз халық игілігіне қызмет жасауда. Тұңғыш Президент бастамасымен ядролық қарудан өз еркімізбен бас тартып, Семей сынақ полигонын жауып, бүкіл әлемге Қазақстанның тұрақтылық пен бейбітшілікке ұмтылған мемлекет екенін көрсеттік. Арқа төріне ажарлы астана салдық. Ағымдағы жылдың наурыз айынан Нұр-Сұлтан есімін иеленген біздің еңселі елордамыз қазіргі заманның жаһандық мәселелерін шешуші диалогтық алаңға айналды. Әлемнің дінбасыларын бір үстел басына жиып, ЭКСПО-2017 көрмесін жоғары деңгейде өткіздік. Мұның барлығын біз Нұрсұлтан Әбішұлы Назарбаевтың қайраткерлік есімімен байланыстырамыз.
Қазақстан Нұрсұлтан Әбішұлының басшылығымен әлемде жоғары беделі бар қуатты мемлекетке айналды. Бұл күні біз Елбасының әлемдік аренадағы бейбітшілікке қосқан тұлғалық рөлін ерекше атап, халықаралық қатынастарды түбегейлі реформалауға бағытталған ұсыныстарын еске аламыз. Әлем тарихында өз елінің өмірін түбегейлі өзгерткен ірі тұлғалар баршылық. Солардың қатарында Нұрсұлтан Әбішұлының да ойып орын алатыны анық. Елбасының Қазақстан тарихында айрықша орны бар, саналы ғұмырын халқына қызмет етуге арнаған елінің адал перзенті әрі жаһандық деңгейдегі саясаткер екені қазірдің өзінде уақыт сынынан айқындалды, — деген Даниал Ахметов Елбасы қайраткерлігі мен халықаралық аренадағы беделі жайлы көзкөрген бірнеше оқиғаны баяндап берді.
Салтанатты жиын мерекелік концертпен қорытындыланды.
Жадыра ТӨЛЕГЕНҚЫЗЫ, «Семей таңы»{jcomments off}
