Жуырда «Nur Otan» партиясы Семей қалалық филиалында партия Саяси кеңесінің кеңейтілген отырысы өтті. Отырысқа облыстық және қалалық мәслихаттардағы партия фракциясының депутаттары, Саяси кеңес, партиялық бақылау комиссиясы, сыбайлас жемқорлыққа қарсы іс-қимыл жөніндегі қоғамдық кеңес өкілдері және партия белсенділері қатысты.
Еліміздегі жетекші партия халық арасы{jcomments off}ндағы түрлі әлеуметтік мәселелерді шешуде белсенді жұмыс атқарып келеді. Партияның Семей қалалық филиалында да бұл жұмыстар қарқынды жүргізілуде. Филиал төрағасы Ермак Сәлімовтің бастамасымен көпбалалы аналарды, жетім балаларды баспанамен қамту, мүмкіндігі шектеулі жандарға жәрдемдесу, ауыл жастарын қолдау, әлеуметтік аз қамтылған топтарға медициналық көмек көрсету және басқа да мәселелер оң шешімін тауып келеді.
Кеңейтілген отырыс барысында «Nur Otan» партиясы Семей қалалық филиалы төрағасының орынбасары Айнұр Арғынбекова партияның бір жыл ішінде атқарған жұмыстарына тоқталды. Айнұр Серікпайқызының айтуынша, ағымдағы жылдың он бір айы ішінде партияның қалалық филиалына халық тарапынан 825 өтініш келіп түсіп, 305-і оң шешімін тапқан.
— 21 тамызда Қазақстанның Тұңғыш Президенті Нұрсұлтан Назарбаевтың төрағалығымен «Nur Otan» партиясы Саяси кеңесінің кеңейтілген отырысында партия жұмысын жүйелі жаңғыртуға бағытталған «Сенім. Диалог. Болашаққа нық қадам — «Nur Otan» партиясының жеті серпіні» бағдарламасы халыққа ұсынылды. Бүгінде қалалық филиалдың 27 бастауыш партиялық ұйымы, он мыңнан астам мүшесі бар. Партия төрағасы тапсырысымен жарна төлемеген екі мыңнан астам адам партия құрамынан шығарылды. Он бір ай ішінде саяси кеңестің тоғыз отырысы өтіп, жергілікті атқарушы орган басшыларының мемлекеттік бағдарламаларды жүзеге асыруы туралы есептері тыңдалды. 11 сұрақ көтеріліп, 21 ұсыныс айтылды. Ағымдағы жылдың 29 қазаны күні «Nur Otan» партиясы Семей қалалық филиалының төрағасы, қала әкімі Ермак Сәлімовтың есебі тыңдалды. Елбасы атап өткендей, партия әр түрлі әлеуметтік құраммен, әсіресе, жастар, қарттар, әлеуметтік әлсіз топтар, жұмыссыздар және көпбалалы аналармен тығыз байланыста жұмыс істеуі керек, әрі азаматтардың сұрақтарына нақты жауап беруі тиіс, — деді Айнұр Арғынбекова.
Осыған дейін партияның 24 жобасы болған болса, қазір сол жобалардың тек 5-еуі қалып отыр. «Ардагерлерді ардақтайық», «Кедергісіз келешек», «Бақытты отбасы», «Құтты мекен», «Халыққа көмек» және «Жастар Отанға» жобаларының барлығы да тікелей әлеуметтік мәселелерді шешуге бағытталған. «Бақытты отбасы» тұрғын үй бағдарламасы бойынша 2019 жылы қалада қаржыландыру көлемі 746 млн. теңгені құраған.
«Еңбек» нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған мемлекеттік бағдарламасын жүзеге асыру аясында он бір айдың ішінде жұмыссыз адамдарға 42,3 млн. теңгені қамтитын 7 несие берілген. «Бастау бизнес» пен «Жас кәсіпкер» жобалары аясында көп балалы отбасы мүшелерінен 49 адам оқудан өтіп, 27 адам 200 айлық есептік көрсеткіш мөлшерінде қайтарымсыз грант ұтып алған.
Қалалық мәслихат депутаты Сергей Покатиловтың айтуынша, Семей қаласында 2019-2021 жылдар аралығында 52 тұрғын үй құрылысы жоспарланған. Оның ішінде бюджетік қырық екі үй, квазимемлекеттік сектор бойынша бес үй және коммерциялық бағытта бес үй салынбақ.
Жиын соңында қаланың әлеуметтік-экономикалық дамуы, тазалығы жайлы да сөз болып, партия жұмысын одан әрі жандандыру мәселесі талқыланды.
Жадыра ТӨЛЕГЕНҚЫЗЫ, «Семей таңы»
