Өткен жұмада «Nur Otan» партиясы Семей қалалық филиалында Бірыңғай жинақтаушы зейнетақы қорының Семей қалалық филиалы Ашық есік күнін өткізді. Бұл жолғы ұйымдастырылған шарада зейнетақыны жоспарлау туралы айтылды. Шараға мемлекеттік органдар өкілдері, тұрғындарға әлеуметтік көмек көрсететін қоғамдық бірлестіктер, «Азаматтарға арналған үкімет» мемлекеттік корпорациясы, қалалық жұмыспен қамту және әлеуметтік бағдарламалар бөлімі, мемлекеттік әлеуметтік сақтандыру қорының өкілдері қатысты.
Қазақстандағы зейнетақы бірнеше деңгейден және төлем көздерінен тұрады. Базалық және ортақ зейнетақы мемлекеттік бюджет есебінен, ал жинақтаушы зейнетақы міндетті және ерікті зейнетақы жарналары есебінен төленеді.
Зейнетақымен қамсыздандыру жауапкершілігі мемлекет, жұмыс беруші және жұмыскер арасында оңтайлы үлестірілген. Сондықтан міндетті зейнетақы жарналарын жұмыс берушінің Қорға уақтылы аударып отыруы жұмыскер үшін өте маңызды. Өйткені зейнетақы жарналардың көлемі мен аударылу жиілігіне тікелей байланысты.
— Қордағы жинақ ақшаңыздың жай-күйінен үнемі хабардар болып отыру үшін ұялы телефоныңызға қордың ENPF мобильді қосымшасын жүктеп алуыңызға болады. Онда push-хабарлама қызметі бар. Оны пайдалану үшін қосымшаның «Баптау» бөліміне кіріп, осы қызметті іске қоссаңыз болды, — дейді «БЖЗҚ АҚ» Семей өңірлік филиалы басшысының орынбасары Ләйлә Сабырқызы.
«Ашық есік күні» барысында «БЖЗҚ» АҚ мамандары келушілерге мобильді қосымшаның басқа да мүмкіндіктері туралы әңгімеледі. Мәселен, зейнетақы калькуляторы арқылы болашақ зейнетақыңыздың болжамды мөлшерін есептей аласыз. Зейнетақы калькуляторы жұртшылық арасында ерекше сұранысқа ие. Сондықтан болар, көп адам қосымшаны осы шара барысында телефондарына жүктеп алып жатты. Бұдан басқа азаматтар ерікті зейнетақы жарналарына да қызығушылық танытты. Бұл жарналар болашақ зейнетақының көлемін арттыруға едәуір септігін тигізеді.
Қор мамандары «жинақтар құнсызданып кетуі мүмкін» деген қауесеттерді жоққа шығарды. Олардың айтуынша, жинақтаушы жүйеде мұндай жағдай орын алуы мүмкін емес. Өйткені мұнда әрбір салымшының атына жеке зейнетақы шоты ашылады. Оған зейнетақы жарналары мен инвестициялық табыс түсіп отырады.
— Бұған Қор сайтының жеке кабинеті арқылы көз жеткізуге болады. Жинақ ақша әрбір салымшының меншігі. Оның үстіне біздің елімізде зейнетақы жинақтарының сақталуын қамтамасыз ететін бірегей модель жұмыс істейді. Соған сәйкес мемлекет инфляция деңгейін ескере отырып, жарналардың міндетті түрлерінің нақты енгізілген мөлшерінде сақталуына кепілдік береді, — дейді Л.Сабырқызы.
Ашық есік күні соңында барлық қатысушыларға арнайы бағалау сауалнамасын толтыру ұсынылды. Сауалнамадағы пікірлер мен ұсыныстар алдағы уақытта ескерілетін болады.
Жадыра ТӨЛЕГЕНҚЫЗЫ, «Семей таңы»{jcomments off}
