«БЖЗҚ АҚ» Семей өңірлік филиалы ағымдағы жылы да бірқатар қызметтік жетістіктерге қол жеткізді. Басты мақсат — зейнетақы жарналарын тарту бойынша ұйымдастыру шараларын жүзеге асыру. Мұның сыртында жеке зейнетақы шотын ашу бойынша өтінімдер қабылдау мен зейнетақы төлемін алушы тұлғалардан қажетті құжаттар қабылдап рәсімдеу, түрлі мәселелер бойынша келген азаматтарға кеңес беру сынды жұмыстар әсте толастамайды. Осы орайда аталмыш өңірлік филиал басшылығымен жаңашылдықтар мен жетістіктер жайында сөйлескен едік. Біздің қойған сауалдарымызға «БЖЗҚ АҚ» Семей өңірлік филиалы басшысының орынбасары Ләйлә Сабырқызы жауап қайырды.
-Ләйлә Сабырқызы, әуелгі кезекте Қордың Семей өңірі бойынша бүгінгі таңдағы атқарып жатқан жұмыстарына тоқталып өтсеңіз.
-Иә, биылғы жылды да ойдағыдай қорытындыламақпыз. Атап айтсақ, ағымдағы жылдың 1-ші қарашасына дейінгі көрсеткіш бойынша Семей өңірлік филиалы бойынша зейнетақы жинақтарының жалпы көлемі 203,3 млрд теңгені құрап отыр. Ал жеке зейнетақы шоттарының саны – 252 930. Бұл дегеніміз тек Семей қаласын ғана емес, көптеген ірі аудандарды да қамтып отырған біздің жұмысымыздың ауқымдылығын көрсетеді. Қазіргі күні филиал кеңселері Абай, Бесқарағай, Бородулиха, Жарма, Аягөз, Үржар сынды аудандарда, Курчатов қаласында жергілікті халықпен тығыз қарым-қатынаста жұмыс жүргізуде. Білікті басшымыз Қайрат Кенбаев басқаратын филиал жұмысының ауқымдылығын осыдан-ақ аңғаруға болады.
— Семей филиалына келу-шілердің көп жағдайдағы өтініш-талаптары қандай?
— Бізге келушілердің өтініштері әртүрлі. Көбінесе жұмыс орны үшін қажетті құжатты, яғни, зейнетақы шартын сұрайды. Жеке кеңес беру бойынша, егде жастағы азаматтармен қатар, келешекте алатын зейнетақысын есептетуге келетіндер де көп. Бұл ретте, жерлестеріміздің ынтасы жоғары. Осы орайда жаңадан іске қосылған болжамды зейнетақы калькуляторы азаматтардың Қор жұмысына қызығушылығын арттырып, өздерінің қамсыз қарттығы үшін алаңдаушылық туғызып жатқанын айта кету ләзім. Сондай-ақ біздің өңірге тән жәйт, өз жинақ ақшасын көбейтудің жолын сұрастыратындар қатары да жыл санап артып келеді. Мәселен, әрбір жұмыс күні операциялық бөлімге әртүрлі сұрақтармен 200-ден аса жуық тұрғын келеді.
Сол тәрізді қазіргі күні зейнетақыны жоспарлау шарасы қарқын алуда. Атап айтсақ, аталмыш бөлім бойынша биылғы жылдың 10 айы ішінде 19 203 Қор салымшысына болашақ зейнетақысын алдын ала есептеу жұмыстары жүргізілді.
— Еліміздің зейнетақы жүйесі бойынша ағымдағы жылдың бір жаңалығы – өзін-өзі жұмыспен қамтушылар үшін зейнетақы аударымын жасаудың жаңа түрі қолданысқа енгізілгені белгілі. Аталмыш мәселе бойынша жыл көлемінде жүргізілген түсіндіру-ақпарат беру шараларына тоқталсаңыз…
— Әрине, жыл басынан, яғни, қаңтар айынан бастап енгізілген бірыңғай жиынтық төлем бойынша азаматтар тарапынан сауалдар көптеп түсіп жатады. Бұл ретте Қор мамандары жылдың басты жаңашылдығының мән-жайын білу үшін кеңес сұрап келген әрбір азаматқа асықпай, егжей-тегжейлі түсіндіріп береді. Сонымен қатар Қор қызметін ұсыну мен түсіндіруде көшпелі таныстырылымдардың маңызы зор екенін айта кеткім келеді. Яғни, біздің қызметіміз жыл бойына тек кеңседе ғана емес, қала мен елдімекендер бойынша түрлі ұйымдар мен кәсіпорындар ұжымдарында да жүргізілді. Атап айтсақ, мұндай жиын-кездесулер барысында ҚР зейнетақы жүйесін жаңғыртудың негізгі бағыттары, көрсетілетін қызметтерді электрондық форматта алу мүмкіндіктері сынды көптеген мәселелер ортаға салынды. Бір бұл емес, Қор қызметіне қатысты өзекті тақырыптар бойынша арнайы әзірленген таныстырылымдар да бар. Мамандар аса қажетті мағлұматтарды слайд түрінде жеткізеді.
Филиалдың мобильді агенттері салымшылардың үйлеріне барып, оларға көшпелі қызмет түрлерін де көрсетеді. Маңыздылығы сол, әсіресе мүмкіндігі шектеулі жандарға, үйде отырған көпбалалы аналарға мейлінше тиімді. Соның аясында биылғы жылдың 10 айының ішінде мүмкіндіктері шектеулі 166 адамның үйіне барып қызмет көрсеттік.
Ал филиал тарапынан жиі көрсетілетін қызметтерге келсек, салымшының деректемелерін өзгерту, толықтыру туралы өтініштерді рәсімдеу, жеке зейнетақы шотынан үзінді көшірме алу тәсілін өзгерту туралы қосымша келісімдер жасау сынды қызмет түрлерін айтуға болады.
Осылайша қандай да бір себеппен, бірінші кезекті денсаулығына байланысты Қор кеңсесіне келе алмайтын салымшы, зейнетақы қызметін үйінде алу үшін Қордың байланыс орталығының 1418 тегін телефонына хабарласып, жағдайын айтып, өтініш қалдыра алады. Сондай-ақ enpf.kz сайтының «Электрондық қызмет көрсету»-«Халықтың әлеуметтік осал топтары үшін электрондық өтініш беру» бөліміне кіріп, тиісті нысандарды толтырып, электрондық өтініш қалдыруға болады. Ал филиал қызметкерлері өтініш берген салымшыға хабарласып, жағдайын анықтап, кездесу уақытын белгілейді. Сөйтіп 5 жұмыс күні ішінде үйіне барып онлайн тәртібінде қызмет көрсетеді. Сонымен қатар филиал мамандары жергілікті ұйымдар мен кәсіпорындарға және режимдік нысандарға барып, зейнетақы жүйесі мен Қор қызметі жайында таныстырылымдық шаралар өткізіп, зейнетақы қызметтерін көрсетеді. Аталмыш бағыттағы жұмыстар ағымдағы жылы біршама ширатыла түскенін айта кеткен жөн. Биылғы жылғы 10 айдың ішінде жергілікті тұрғындармен 1135 рет кездесу өткізіліп, оған жалпы саны 31 571 адам қатысып, Қор қызметі жайында толыққанды мағлұматтар алды. Мұндай басқосулардың берері сол, азаматтардың қаржылық сауаттылығы арта түседі. Сонымен қатар өздерінің және жақындарының қамсыз қарттығы үшін тиімді шешімдер қабылдауға мол мүмкіндік береді.
— Газет оқырмандарын филиал қызметкерлерінің қоғамдық өмірі де қызықтырады екен. Осы тарапта атқарылған жыл үлесіндегі іс-шараларға тоқталып өтсеңіз…
— Әрине, БЖЗҚ АҚ Семей өңірлік филиалы да тұтас бір аймақтағы іргелі мекемелердің бірі. Сондықтан да қоғамдық шаралардан әсте шет қала алмаймыз. Оның үстіне біздің ұжымда өнерлі, спортты сүйетін қыз-жігіттер қатары өте көп. Осы ретте биыл «БЖЗҚ АҚ» филиалдары арасында өткізілетін мәдени-спорттық шараларға қатысуда біздің жастар мейлінше белсенділік танытқанын айта кеткім келеді.
Мұның сыртында филиал қызметкерлері өңіріміз бойынша қайырымдылық шараларына да қатысып, әлеуметтік тұрғыдан аз қамтылған отбасыларға көмектесуде өз үлестерін елеулі түрде қосып жүр. Мысалы, биылғы жылдың тамыз айында республикалық «Мектепке жол» қайырымдылық акциясы аясында көпбалалы отбасылардан шыққан оқушыларды оқу жылына даярлауға демеушілік жасадық.
Ал қараша айында өткен Ұлттық валюта күнінде Семей қаласындағы екінші деңгейлі банктер арасында ұйымдастырылған спартакиадаға қатысып, спорттың әр түрі бойынша жүлделі орындарды еншіледік.
Бір бұл емес, осы қараша айында ғана өнерпаз қыз-жігіттеріміз Жайдарман ойындарының слетіне қатысып, өнер көрсетті. Мұның барлығы қоғамдық өмірімізден келтірілген бірер мысал ғана. Қоғамның игілігі үшін әлі де қомақты үлес қоса беретінімізге сенімдімін.
— Сөз соңында алдағы уақыттағы жоспарларыңызбен бөлісе кетсеңіз.
— Алдағы уақытта да «БЖЗҚ АҚ алдына қойып отырған мақсат-міндеттерді орындауда табыстарға жетеміз деген ойдамын. Дегенмен, келергі жылы Қор салымшыларына электронды қызмет көрсету көлемін ұлғайтып, тұрғындардың зейнетақы мәселесі бойынша қаржылық сауаттылығын арттыра түсуді көздеудеміз.
— Сұхбатыңыз үшін рахмет. Қызметтеріңіз әрдайым табысты болсын!
Сұхбаттасқан Қуаныш ЖОЛЫМБЕТ «Семей таңы».{jcomments off}
