ШҚО тілдерді дамыту жөніндегі басқармасы ағымдағы жылғы 6 желтоқсанда Өскемен қаласында Фариза Оңғарсынованың 80 жылдығына орай облыстың талантты жастары арасында «Жүрегім жырмен тербелген» атты облыстық Фариза оқуларын өткізді.
Мақсаты – мемлекеттік тілдің қолданылу аясын кеңейту, тіл мәдениетін көтеру, көркем әдебиетті насихаттауды жандандыру, талантты жастарды қолдау.
Шараға облысымыздың аудан, қалаларынан 15 үміткер қатысты.
Сайыс барысында үміткерлер ақынның табиғат, махаббат, туған жер тақырыптарындағы өлеңдерінен үзіндіні мәнерлеп оқып, қазақтың белгілі ақындарының Тәуелсіздікке арналған жыр шумақтарымен отансүйгіштік рухты оятты. Байқаудың соңғы кезеңінде үміткерлер халық әні мен Фариза Оңғарсынованың сөзіне жазылған әндерді орындау арқылы әншілік қабілеттерін танытты.
Қатысушылардың өнерін бағалау кезінде қазылар алқасы үміткерлердің өлеңді оқу шеберлігіне, дауыс мәнеріне, тіл тазалығына және сахнада өзін-өзі ұстауына назар аударды.
Қазылар алқасының шешімімен облыстық байқаудың Бас жүлдесін Семей қаласынан келген Нұрсұлтан Төлеубай иеленді. 1-орынды күршімдік Назерке Қайролданова, 2- орынды Жарма ауданынан келген Сәуле Қайырбекова, 3-орынды Аягөз ауданынан Мейіржан Елеукенов жеңіп алды. Байқаудың «Тәуелсіздік тұғырым» аталымы бойынша Өскемен қаласынан Наргиз Оқасова, «Әнді сүйсең менше сүй» аталымында Шемонаиха ауданынан Дархан Рамазанов, «Өлең мен сені аялап өтемін» аталымы бойынша Глубокое ауданынан Қымбат Тұрарбек марапатталды.
Жеңімпаздарға ШҚО тілдерді дамыту жөніндегі басқармасының дипломдары мен бағалы сыйлықтары тапсырылды.
ШҚО тілдерді дамыту жөніндегі басқармасы{jcomments off}
