Жыл соңында республика тұрғындары арасында ең көп талқыға түскен елеулі жаңалықтың қатарында ҚР Парламенті Мәжілісінің депутаты Азат Перуашевтың Премьер-министр Асқар Маминге Семейге республикалық маңызы бар қала мәртебесін беру туралы ұсынысын айтуға болады.
Өткен жылы Шымкент қаласы дәл осындай мәртебеге ие болып, Түркістан облыс орталығына айналған болатын. «Ақ жол» партиясынан сайланған депутат бұл оқиға тұтас аймақтың дамуына зор ықпал еткенін атап айтты. Сондай-ақ «Қазақстан Республикасының әкімшілік-аумақтық құ-рылысы туралы» Заңына сәйкес, халық саны бір миллион адамнан асатын немесе ерекше мемлекеттік маңызы бар қалаларға республикалық маңызы бар қала мәртебесі берілетінін еске салып өткен Азат Перуашев:
– Біздің ойымызша, Семей ерекше маңызы бар қалалардың қатарында болуы тиіс. Ол – ұлы Абай мен Мұхтардың туған топырағы ғана емес, Алаш Орда идеологиясының бесігі. Сол себепті мемлекет басшысының атына ұсыныс дайындау қажет,– деп түйіндеді.
Мәжіліс депутаты айтып өткендей, Семей қаласы шекаралық аймақта орналасқандықтан, сауда-саттық пен ел экономикасының өсуіне де оң ықпал жасайды. Көптен бері облыс орталығы мәртебесінен айырылған Семей шаһарының бүгінгі келбеті осындай үлкен өзгерісті қажет етіп-ақ тұр… Әлеуметтік желідегі халық пікіріне назар аударсақ, Семей қазақтың рухани астанасы деген атауына қай жағынан болмасын толығымен лайықты болуы тиіс. Бұл — әрбір ұлтжанды азаматтың намысына сын болатын мәселе.
Осы жерде айта кеткен жөн болар, елорда төрінде отырса да Азат Тұрлыбекұлы Алаш тақырыбын жиі көтеріп жүр. Бұл бастама да кешегі Алашорданың бас кеңсесі орналасқан Семей қаласының тарихи һәм рухани маңыздылығын биіктетуге бағытталып отырғаны анық. Бұл ұсыныстың Парламенттегі өз жерлестеріміздің тарапынан жасалатын жөні бар еді…
Егер Мәжіліс төріндегі ақжолдық төраға ұсынған ақжолтай ұсыныс қабылданып, Семейге республикалық маңызы бар қала мәртебесі берілсе, оған тек семейліктер ғана емес, алаш атын ардақ тұтатын күллі республика халқы үшін қуанышты оқиға болары сөзсіз.
«СТ» — ақпарат{jcomments off}
