«Назарбаев Зияткерлік мектептері» дербес білім беру ұйымы 2020-2021 оқу жылына 7 сынып оқушыларын қабылдау мақсатында Қазақстан Республикасы Тұңғыш Президенті – Елбасының «Өркен» білім беру грантын тағайындау жөнінде байқау жариялады. Осыған орай 24 желтоқсан күні ақпараттық орталықта Семей қаласының Назарбаев зияткерлік мектебінің директоры Бағдан Қайыржановтың және орынбасары Гүлнара Қайырханованың қатысуымен баспасөз мәслихаты өтті.
Осыдан он жыл бұрын әлемдегі және елдегі озық жүйені жинақтап, тәжірибелік алаң ретінде құрылған Назарбаев зияткерлік мектептері бүгінде халықаралық мектеп дәрежесіне жетті.
«Назарбаев зияткерлік мектептері» дербес білім беру ұйымы Халықаралық мектептер кеңесінің (CIS), Юнеско мектептері Ассоциацияның, ЮНЕСКО клубының мүшесі. NIS-PROGRAMM деп аталатын оқу бағдарламасы дүниежүзінің көптеген елдерінде, сонымен қатар рейтингі жоғары оқу орындарында мойындалып отыр.
— «Назарбаев зияткерлік мектептері» дербес білім беру ұйымы 7 сынып оқушылары үшін Қазақстан Республикасы Тұңғыш Президенті – Елбасының «Өркен» білім беру грантын тағайындау жөнінде байқау жарияланды. Құжаттарды қабылдау 2019 жылғы 18 желтоқсан мен 2020 жылғы 31 қаңтар аралығында Семей қаласы бойынша Қарағайлы ықшамауданы, 1 мекенжайы бойынша жүргізіледі. Зияткерлік мектепке түсуге іріктеу конкурсына қатысу үшін үміткер өтініш беріп, сауалнама толтырады. Және Туу туралы куәлігінің көшірмесі, ЖСН, заңды өкілінің ЖСН көрсетілген жеке куәлігінің көшірмесі, 086/у форматындағы медициналық анықтамасы керек. Үміткер құжаттарды желтоқсан айына дейін тапсырса 5 сыныптың, егер қаңтар айында тапсырса 6 сыныптың І жарты жылдық табелі қабылданады. Құжаттар дүйсенбі-сенбі күндері сағат 9.00-18.00 аралығында, ал жексенбі күндері 10.00-15.00 аралығында қабылданады,- дейді Семей қаласындағы Назарбаев зияткерлік мектебі директорының орынбасары Гүлнара Қайырханова. Үміткерлер білім деңгейін тексеру үшін ақылы сынақ тестілеуге қатыса алады. Барлығы бес сынақ тестілеу жоспарланған. Алдағы уақытта 4 қаңтар, 18 қаңтар және 1 ақпан күндері өтетін сынақ тестілеуді тапсыру мүмкіндігі бар.
Тестілеу математика, сандық сипаттама, қазақ, орыс және ағылшын тілдерінен өтеді. Ең жоғарғы ұпай – 1300 балл: математика пәнінен 400 балл, қазақ, орыс, ағылшын тілдерінен 200 баллдан және сандық сипаттамадан 300 балл.
— Негізгі тестілеу 14-15 наурыз күндері өтеді. Үміткерлер бірінші күні математика пәнінен және логикалық қабілетінен сынақ тапсырады. Тапсырмаларды орындауға алпыс минут уақыт беріледі. Ал келесі күні қазақ, орыс, ағылшын тілдерінен емтихан алынады. Оған қырық минут уақыт беріледі. Математика бойынша шекті балл — 140, сандық сипаттамадан — 120 балл, — дейді Г.Қайырханова.
Айта кетейік, Назарбаев зияткерлік мектебінің «NIS-PROGRAMM» оқу бағдарламасы бойынша бітірген түлектерге дүние жүзіндегі кез келген оқу орнында оқуға мүмкіндік беріледі. Назарбаев зияткерлік мектебіне білім алушылар тек 7 сыныпқа түсетін кезде қабылданады. Семей қаласындағы Назарбаев зияткерлік мектебіне шет ауылдардан қабылданған оқушылар үшін 120 орындық жатақханасы бар.
Қосымша сұрақтар туындаған жағдайда, 8(7222) 63-63-50, 63-22-81 нөмірлеріне хабарласуға болады. Сонымен қатар толығырақ ақпаратты www.nis.edu.kz сайтынан ала аласыздар.
Жадыра ТӨЛЕГЕНҚЫЗЫ, «Семей таңы
{jcomments off}
