25 желтоқсан күні қалалық әкімдікте шаһар басшысы Ермак Сәлімов әр саланың үздіктеріне «Қалаға сіңірген еңбегі үшін» медалін табыстады.
«Қалаға сіңірген еңбегі үшін» медалі адал еңбек етіп, қызметінде жетістікке жеткен азаматтарға құрмет көрсету мақсатында биыл алғаш рет тапсырылып отыр.
— Ардақты ағайын, құрметті әріптестер. Баршаңызды өткен Тәуелсіздік күнімен және келе жатқан Жаңа жыл мерекесімен шын жүректен құттықтаймын! Бүгінгі басқосудың жөні бөлек. Семей тарихында мұндай шара алғаш рет өтіп жатыр. Біз өздеріңіздей қалаға жанашыр адамдарға құрмет көрсетіп, туған қаламыз Семейге адал қызмет жасап, еңбек сіңірген тұлғаларды марапаттамақпыз. Осында отырған әр адамның Семей үшін орны бөлек. Біз сіздерді мақтан етеміз. Жақсылық жасап, елдің батасын алып жүрген өздеріңізге зор ризашылық пен шынайы алғысымды білдіремін. Елбасы мен Мемлекет басшысының, Үкіметтің және облыс әкімінің қолдауымен жаңарып, дамып келе жатқан сүйікті қаламызды одан әрі бірге көркейте берейік. Жаңа жыл жаңа табыстар әкелсін!- деді жиында сөз алған қала әкімі Ермак Сәлімов.
«Қалаға сіңірген еңбегі үшін» медалімен «Семей таңы — Вести Семей» газеттері ЖШС директоры Риза Молдашева, Қазақ инновациялық гуманитарлық-заң университеті ректоры Шырын Құрманбаева, Семей қаласының Шәкәрім атындағы мемлекеттік университетінің ректоры Мейір Ескендіров, қалалық №2 сот төрағасы Жанат Әбенова, Семей қаласы полиция басқармасының басшысы Мақсат Зекенов, Төтенше жағдайлар басқармасы басшысы Бақытбек Байбуров, Семей қаласы бойынша мемлекеттік кірістер басқармасы басшысы Қуаныш Мұхаметқалиев, денсаулық сақтау саласының ардагері Нина Гладышева, Семей қаласының Перинаталдық орталығы директоры Архат Дайырбеков, №3 қалалық аурухана директоры Найля Альменева, Қоғамдық кеңес төрағасы Зульфия Жамалтдинова, «Ер-Стом» тіс емханасының дәрігері Сиязбек Ахметов, сот жүйесі ардагерлері Кенжеш Мұқашев, Аманбай Алдияров, «Сликат» ЖШС бас директоры Борис Адианов және өзге де қаламыздағы кәсіпорын басшылары, мектеп директорлары, медицина, білім беру, құқық қорғау мен мемлекеттік қызмет саласының үздіктері марапатталды.
Р.S. «Қалаға сіңірген еңбегі үшін» медалімен «Семей таңы» газетінің бір топ қызметкерлері де марапатталды. Әріптестерімізді құттықтай отырып, еңбектеріне жеміс, отбасыларына амандық тілейміз!
Жадыра ТӨЛЕГЕНҚЫЗЫ, «Семей таңы»{jcomments off}
