Өткен аптада Семейге жұмыс сапарымен Қазақстан Республикасы Мәжілісінің депутаттары Василий Олейник, Евгений Козлов және Жанат Омарбекова келіп, бірқатар нысандарды аралап, жұртшы-лықпен кездесті.
Апта бейсенбісінде ҚР Парламенті Мәжілісінің депутаты Жанат Ануарбекқызы Омарбекова және Семей қаласы мәслихатының хатшысы Бейсенбек Ақжалов, «Nur Otan» партиясы Семей қалалық филиалы төрағасының бірінші орынбасары Айнұр Арғынбекова, ШҚО денсаулық сақтау басқармасы басшысының орынбасары Гүлнар Шәріпова Семей медициналық университетінде болды.
Қонақтарға алдымен университетке қысқа экскурсия ұйымдастырылып, оқу ордасының оқытушылар мен студенттерге қызмет көрсету орталығының, оқу-клиникалық орталығының, анатомиялық мұражай мен аудио-бейнежазба студиясының жұмыстары таныстырылды.
Кездесу барысында «Семей медицина университеті» КеАҚ басқармасы төрағасы Ерсін Жүнісов оқу ордасының «білім, ғылым және клиника» үштігіндегі жетістіктері туралы баяндама жасап, дәрігер мәртебесі туралы Заң жобасын әзірлеуді ұсынды. Өз кезегінде Жанат Ануарбекқызы мұндай кодекс Парламентте қарастырылып жатқанын жеткізді. Сонымен қатар депутат университеттің кафедра меңгерушілерімен бірге «Халық денсаулығы және денсаулық сақтау жүйесі туралы» ҚР-ның жаңа кодексін талқылап, дәрігерлер мен оқытушылардың ұсыныстарын тыңдады. Отырыс барысында сондай-ақ ядролық сынақ полигонынан зардап шеккендердің зейнет жасын қысқарту және денсаулықтарын оңалту, мүмкіндігі шектеулі азаматтарға жағдай жасау мәселелері сөз болды.
Келесі күні ҚР Парламенті Мәжілісінің депутаттары Василий Олейник, Евгений Козлов және Жанат Омарбекова «Nur Otan» партиясының Семей қалалық филиалында қалалық мәслихат депутаттарымен кездесті. Мұнда мәслихат депутаттары шаһардағы әлеуметтік-экономикалық мәселелерге қатысты түрлі сауалдарын қойды. Қалалық мәслихат депутаты әрі Қоғамдық кеңес төрағасы Зүлфия Фазылжанова медицина саласына қатысты жергілікті халықты толғандыратын сауалдардың көп екенін жеткізе келе, Семейге берілген мәртебені пайдалана отырып, қаланың өзіне қарасты денсаулық сақтау бөлімін ашуды өтінді. Қоғамдық кеңес мүшесі Жанар Құсайынова ядролық сынақ полигонынан зардап шеккендерді зейнеткерлікке ерте шығару және жастарға экологиялық өтемақы төлеу туралы ұсынысын жеткізді. Депутат Р.Хазипов Семейде арнаулы экономикалық аймақ ашу жайын қозғаса, Электротехникалық колледж директоры Азат Сәрпеков ресми емес қысқа мерзімді курстарды лицензиялауды өтінді.
Депутаттар жиын барысында айтылған барлық ұсыныстарды мұқият тыңдап, заң шеңберінде қарастыратындарын жеткізді. Сондай-ақ Ұлы Абайдың 175 жылдығына орай Абай музейіндегі жөндеу жұмыстарын қадағалауды қалалық мәслихат депутаттарына тапсырды.
Жадыра ТӨЛЕГЕНҚЫЗЫ, «Семей таңы»{jcomments off}
