Абайтану саласының соңғы уақыттарда біршама тоқырап қалғаны жасырын емес. Ал Президентіміз Қасым-Жомарт Кемелұлының мақаласы осы бағытты көтеруге, дем беруге үлкен ықпал етеді. Себебі аталмыш мақаласында Президент абайтану ғылымындағы бірқатар өзекті мәселелерді, олқылық-кемшіліктердің орнын толтыруды да тап басып, дәл көрсетіп берген.
«Сыртын танып іс бітпес, сырын көрмей»,- деп Абай хакімнің өзі айтқандай, бүгінде ақын сөзінің ішкі сырын жеткізу, шығармаларына түсінік беру ісіне баса көңіл бөлуіміз керек. Президент осы жайтқа назар аударып, терең мән беріп отыр. Алдағы тойды өткізудегі мақсат та, мағына да сол болуы керек деген ой жатыр.
Бұл Абайдың адамдық туралы ілімін, «Толық адам» концепциясын, «иманигүл: үш сүю», жантану туралы ілімдерін кеңінен насихаттау керек дегенді білдіреді. Яғни, хакімнің рухани мұрасы саналатын ой-танымдарды жас ұрпақ тәрбиесіне пайдалану — қазіргі заманның талабы. Олай болмағанда, озық ел атанып, өркениетке жете алмаймыз.
Осылайша Президент осы мақаласы арқылы Абай өз заманында бастап кеткен рухани жаңғырудың екінші кезеңіне бет бұруға, жандандыра түсуге үндейді. Бұл ретте абайтану ілімінің көп мәселелері Президент тапсырмасы аясында толыға түседі деген ойдамын.
Түйіндей айтсақ, әлі де терең ден қойып, Абайды түсіндіру, жеткізу керек.
Ал Президентіміздің осы мақаласы арқылы Абай хакімнің рухани мұрасына, оның қалдырған баға жетпес іліміне құрметпен қарайтынын, жоғары дәрежедегі интеллектуал екенін де аңғардым. Бұл, сөз жоқ, бізді де қуантады.
Асан ОМАРОВ,
абайтанушы ғалым, техника және философия ғылымдарының кандидаты{jcomments off}
