Кеше, апта дүйсенбісінде, қалалық әкімдікте ШҚО әкімінің орынбасары Бақытжан Байахметовтың қатысуымен арнайы брифинг өтті. Басты тақырып соңғы уақыттардағы байқалған Ертіс өзені суының өз деңгейінен көтерілуі және соның салдарынан болуы ықтимал тосын жайтқа даярлық шараларын пысықтау болды.
Жиналған БАҚ өкілдері алдында сөз алған Семей қаласының әкімі Ермак Сәлімов Ертіс өзені бойынша қазіргі таңда қалыптасқан жағдайға тоқталды. Соңғы тәуліктерде байқалғандай, өзен суы өз деңгейінен біршама жоғарылаған. Шамамен алғанда таңғы сағат сегізден кешкі сағат 8-ге дейінгі аралықта сағатына 3-5 сантиметр шамасында су ағынының көтерілуі тіркелген. Дегенмен бұл әзірге қалыпты құбылыс саналады. Себебі төтенше жағдай жариялауға негіз жоқ және апаттық жағдайдың шекті мөлшері тіркелмеген. Әйтсе де, «Жаман айтпай, жақсы жоқ» демекші, кез келген жайтқа әзірлік керек. Осы жайында сөз өрбіткен қала басшысы облыс әкімі Даниал Ахметовтің тапсырмасы аясында жүргізіліп жатқан жұмыстарға тоқталып өтті.
— Ертіс өзеніндегі су деңгейінің көтерілуі екі күн бұрын басталды. Қазіргі күні бұл жайтты толық бақылауға алдық. Облыс әкімі Даниал Кенжетайұлының тапсырмасымен арнайы жұмыс жүргіздік, — деген Ермак Бидахметұлы осынау бағытта атқарылып жатқан шаралар қатарына кеңінен тоқталды.
— Біздің назарымызда су жайылуы мүмкін аудандар тұрғындарын сақтандыру және ықтымал жағдай орын ала қалған шақта оларды орналастыру ісі тұр. Қаланың Шығыс кенті мен Пристань, Мирный аудандарына бірінші кезекте көңіл аударылуда. Оларға ескерту жасалды. Өткен түнде арнайы комиссия су жайылуы мүмкін делінген аумақтарды толық қарап шықты. Азаматтық қорғаныс жоғары деңгейде, — деген қала әкімі қауіптің алдын алу бойынша жарылыс жұмыстарын жүргізу жоспарда жоқ екенін айтты.
Осылайша, аталмыш жайтқа кеңінен тоқталған шаһар басшысы алып-қашпа әңгімелер мен қаңқу сөздерге жол бермеуге шақырды.
Су деңгейінің көтерілуіне мұз кептелістерінің орын алуы себеп болып отыр. Биылғы қыстың жылылығынан өзен бетіндегі мұз жұқа болды және мұздың ағын судың әсерінен бұзылуынан кептеліс туындау жағдайы жиілеуде. Болжам бойынша, өзен ағыны жиналған мұзды ағызып әкетіп, су өз бағытын табуы тиіс.
Жиын барысында айтылғандай, бұл жайтқа Шүлбі су электр станциясының еш қатысы жоқ. Қазіргі жағдай бірқалыпты, тұрақты. Дүрбелең туғызуға еш негіз жоқ. Арнайы құрылған штаб тәулік бойы бақылау жүргізуде.
Брифингте сонымен қатар көктемгі су тасқынының алдын алуға байланысты даярлық шаралары қазірден басталғаны да айтылды. Бұл ретте қала ішіндегі қызыл су басу қаупі жоғары аумақтардың картасы жасалынған. Сонымен қатар тікұшақ арқылы әуеден бақылау жұмыстары жүргізілетін болады.
Жиында Шүлбі су электр станциясының техникалық директоры Иван Долгопятов сөз алып, қазіргі таңдағы су деңгейінің көтерілуіне ГЭС-тің қатысы жоқ екенін қайталап жеткізіп, босатылатын су көлемін тек құзырлы орындардың рұқсатынсыз өзгерте алмайтынын жеткізді. Яғни, режімді өз еріктерімен өзгертуге құқылы емес. Сонымен қатар Ертіс бассейндік инспекциясымен тығыз қарым-қатынаста жұмыс жүргізуде.
Брифинг аяқталған соң бірқатар БАҚ өкілдері қала әкімімен бірге Ертіс су алабын, қала аумағын әуеден бақылап қайтты.
Өз тілшіміз{jcomments off}
