Соңғы уақытта семейлік тұрғындар тарапынан қалалық жылу беру мекемелеріне түбіртектерде көрсетілген соманың шамадан көп болуы жөнінде шағымдар келіп түсуде. Осыған орай шаһардағы ақпараттық орталықта «Теплокоммунэнерго» МКК қызметкерлері баспасөз мәслихатын өткізіп, берілген шоттардың жағдайын, соңғы есептеулер жайын кеңінен түсіндіріп, БАҚ өкілдерінің сауалдарына жауап қайырды.
Брифинг барысында жылу берушілер айтып өткендей, кейбір тұрғындар түбіртектердегі соманың есептеулерін дұрыс түсінбеген. Тариф құны көтерілген жоқ және тұтынылған жылу үшін төлемақы артық көрсетілмеген. Ал түбіртектердегі соманың жоғары болуының өзіндік себебі бар екен.
— Монополияға қарсы комитеттің ұсынысы бойынша, біз жылу есептеуіш құралдарындағы көрсеткіштерді басқа күндері түсіруге мәжбүр болдық, яғни есептеу жұмыстарын қарашаның 1-нен 20-на дейінгі аралықта жүргіздік. Осылайша, қараша айының қалған он күнін желтоқсан айындағы көрсеткіштерге қостық. Ал жылдың аяғы болуы себепті біз 26-шы желтоқсанға дейінгі көрсеткіштерді есептеп, қорытындысын шығардық. Міне, сол себепті де түбіртектердегі көрсеткіш қараша айындағы жіберілген төлемақылармен салыстырғанда анағұрлым жоғары болып отыр. Біз артық есептеген жоқпыз, — деп баса атап өткен «Теплокоммунэнерго» МКК-нің жылу инспекциясы басшысы Жұман Мусин жылумен қамтылушы тұрғындар артық ақы төлемейтінін жеткізді.
Ал келесі айдан бастап барлық абонент әрбір ай бойынша толық көлемде төлейтін болады. Яғни, қалалықтар арасында түсінбеушілік туғызып, тіпті дүрбелеңге дейін әкелген осынау жайт қалыпты ырғағына түсетін болады.
Брифинг барысында кейбір жылу тұтынушылардың осынау жайтқа байланысты реніш тудырғандары орынсыз екені де айтылды. Себебі биылғы желтоқсан айындағы қорытынды төлемақы өткен жылмен салыстырғанда анағұрлым төмен екен. Оның басты себебі температуралық режімде болып отыр. Өткен айдағы ауа температурасының жылдық нормадан біршама жоғары болуы берілетін жылуды үнемдеуге мүмкіндік туғызып, соның нәтижесінде жылу ақысы да азайып отыр.
Брифинг барысында тұтынушылар құқығын сақтауға байланысты ұсыныстар да айтылды. Егер абонент есептеулерге қатысты қосымша кеңес алғысы келсе, әрбір жұмыс күні сағат 8-00-ден 17-00-ге дейінгі аралықта «Теплокоммунэнерго» МКК-нің есеп бөліміне келуіне болады. Осылайша, есептеулерді салыстырып, жылу ақысы бойынша қажетті мәліметтерді ала алады.
Сонымен қатар баспасөз мәслихаты барысында жылу беруші мекеме өкілдері жергілікті журналистердің сауалдарына да толыққанды жауап қайырды. Атап айтсақ, қазіргі күні қала бойынша жылумен қамту қалыпты жағдайда жүргізілуде. Барлық қазандықтар мен жылу беру жүйелері бір қалыпты ырғақта, толық күшінде жұмыс істеп тұр. Пәтерлердің температурасына байланысты тұрғындар тарапынан шағымдар түспеген. Көмір қоры да жеткілікті. Яғни, алаңдатарлықтай мәселелер жоқ деуге болады.
Азамат ЕРСАЙЫН, «Семей таңы»{jcomments off}
