Өткен аптаның жұмасы күні Семей қаласындағы №37 гимназияда қоғам қайраткері, «Ана тілінің айбары» төсбелгісінің иегері Бәтташ Сыдықұлының құрметіне арналған мемориалдық тақтаның салтанатты түрдегі ашылуы болып өтті. Аталмыш рәсімге Семей қаласы әкімдігінің басшылығы, шаһардағы зиялы қауым өкілдері мен Бәтташ Сыдықұлының ұрпақтары, шәкірттері, ұстаздар қауымы, қазақ тілінің жанашырлары мен жергілікті БАҚ өкілдері жиналды.
Салтанатты шара барысында жиналған көпшілік алдында Бәтташ Сыдықұлының тәлімін көрген шәкірттері сөз алып, ұстаздары жайында тебірене пікір білдіріп жатты. Бәтташ Сыдықұлы — шәкірт тәрбиесінде де елеулі жетістікке жеткен, талайдың жүрегіне жол тауып, шығармашылық мүмкіндіктерін ашқан, бү-гінгі таңдағы қаламыздың көптеген танымал азаматтарына ақылшы-ұстаз болған тұлға.
Ал оқу ордасының залында ұйымдастырылған басқосуда қала басшысының орынбасары Айдар Садырбаев құттықтау сөз алып, ізгі тілегін білдірді.
Мемлекеттік тілдің дамуына атсалысып, өңірімізде қазақ тілінде білім беретін мектептер мен бірқатар балабақшалардың ашылуына ұйытқы болған тұлға жайлы пікір білдірушілер оның еңбегі бүгінгі ұрпақтың игілігіне айналғанын толғана жеткізді. Соның бір мысалы ретінде 37-ші гимназияның ашылуына да Бәтташ Сыдықұлы бастамашы болғаны жайлы айтылды.
Халықаралық «Қазақ тілі» қоғамының вице-президенті, Қазақстан халқы Ассамблеясының мүшесі, Халықаралық «Ана тілі» газетінің тілшісі Орал Шәріпбаев та кешегі күндері қазақ тілінің қорғаны болған ел ағасының, қадірменді ұстаздың еңбек жолы мен қайраткерлігіне тоқталды.
Ал аталмыш мектептің директоры Жанат Малгаж-дарова БАҚ өкілдеріне берген сұхбатында{jcomments off} оқушылардың жетістіктері жайында айтып өтті.
Қазіргі күні аталған оқу орны қаламыздағы жоғары оқу орындарымен тығыз қарым-қатынаста жұмыс жүргізеді. Ғылыми жұмыстармен айналысатын мектеп шәкірттерінің көбі жүлделі орындар алып жүр.
Жалпы, қаламыздағы №37 гимназияда Бәтташ Сыдықұлының құрметіне осыған дейін «Шешендік сөз өнері» орталығы ашылған болатын. Бүгінде жас ұрпақтың ана тіліне құрметін арттыруда жан жақты жұмыс жүргізіп келеді. Аталмыш орталықтың жетістіктері жайында Гүлім Аспандиярова журналистер қауымына кеңінен әңгімелеп берді.
Өз тілшіміз
