Өткен аптада Семей қалалық әкімдігінде қала әкімі Ермак Сәлімовтің қоғамдық кеңес өкілдері алдында есеп беру жиыны болып өтті. Жиынға сонымен қатар қоғамдық бірлестіктер мен ұйымдар жетекшілері, БАҚ өкілдері де қатысты.
Жиналғандар алдында сөз алған шаһар басшысы әуелгі кезекте өткен 2019 жылы өзіне жүктелген міндеттемелер туралы кең көлемде сөз өрбітті. Сонымен қатар қаламыздың әлеуметтік-экономикалық саласының даму барысына да тоқталып өтті. Бұл ретте өңіріміз бойынша қарқынды даму динамикасы айқын байқалады.
Өткен жылы 209 млрд теңгеге өнеркәсіп өнімі өндірілген, бұл алдыңғы жылдың деңгейінен 24,3 млрд теңгеге артық екен. Облыстық көлемдегі үлесі 9,8 %-ды құрады.
Қаланың өнеркәсіп әлеуетінің жалпы көлемінің зор үлес салмағын өңдеуші өнеркәсіп алып отыр. Өнеркәсіп өндірісінің өсіміне металлургия саласы үлкен үлес қосқан.
Сонымен қатар индустриялық-инновациялық дамытудың 2015 — 2019 жылдарға арналған мемлекеттік бағдарламасы аясында да ілкімді жұмыстар нәтижелі жүзеге асырылды. Ал экономикалық саясаттың негізгі басымдықтарының бірі қолайлы инвестициялық климатты қалыптастыру, инвестиция тарту екендігі белгілі. Есепті кезеңде 78,7 млрд теңге инвестиция тартылған, бұл алдыңғы жылдың деңгейінен 12,7 %-ға көп, оның ішінде бюджеттік қаражат 34 млрд теңгені, жеке инвестициялар 44,7 млрд теңгені құрайды.
— Жыл қорытындысы бойынша бюджетке 22,3 млрд теңге меншікті кірістер түсті. Өткен жылға қарағанда өсу қарқыны 116,9% қамтамасыз етілді. Жоғарыда тұрған бюджеттерден 44,6 млрд теңгеге трансферттер мен қарыздар түсті. Өткен жылы бюджеттің жалпы көлемі 66,4 млрд теңгені құрады, бұл алдыңғы жылға қарағанда 48%-ға артық. Сонымен қатар ағымдағы бюджеттік бағдарламаларға 34,7 млрд теңге, дамытуға 31,7 млрд теңге бағытталды,- деді өз сөзінде өңірдегі бюджеттің игерілуі бойынша сөз қозғаған қала басшысы.
Сондай-ақ Ермак Бидахметұлы өңіріміз бойынша ауылшаруашылық дақылдарына арналған егістік алқаптарының алаңы да артып отырғанын айтып өтті. Өткен жылы игерілген жер көлемі 1009 гектарға ұлғайыпты.
Есепті кезеңде егістік алқаптары 26,8 га ұлғайтылып, тамшылатып суару әдісін қолдану нәтижесінде картоп пен көкөніс түсімі 8 пайызға артқан. Сонымен қатар астық, күнбағыс, картоп пен көкөністің де түсімі жоғары. Бұл бағыттағы жұмыстарды биылғы жылы да өз қарқынымен жүргізу көзделіп отыр.
— Біздің өңірімізде көптеген шаруа қожалықтары жоғары нәтиже көрсетті. Мәселен, «Нұр» шаруа қожалығы өткен жылы бордақылау алаңын салды,- деп атап өткен Ермак Бидахметұлы мал шаруашылығының жем-шөп қорын жақсарту мақсатында атқарылып жатқан шаралар қатарына да тоқталып өтті.
Жайылымдықтарды суландыру инфрақұры-лымын құру және мал шаруашылығы қожалықтарын сумен қамтамасыз ету бағдар-ламасы шеңберінде бұрындары қолданыста болған 30 құдық қайтадан қалпына келтірілген.
Жұмыспен қамтуға жәрдемдесу шаралары бойынша Нәтижелі жұмыспен қамтуды және жаппай кәсіпкерлікті дамытудың «Еңбек» бағдарламасы үш бағытта іске асырылып жатыр. Бұл ретте қала әкімі өткен жылдың еншісіндегі атқарылған жұмыстар қатарына кеңінен тоқталды. Әсіресе әлеуметтік сала бойынша аз қамтылған отбасылар мен көпбалалы аналар үшін ерекше көңіл бөлінді. Сондай-ақ еңбек нарығындағы ахуал да айтарлықтай жақсарған. Өткен жылдың соңындағы көрсеткіштер бойынша өңіріміздегі жұмыссыздар саны анағұрлым қысқарған.
Қала әкімі сонымен қатар абаттандыру, құрылыс саласы бойынша да кең көлемде мағлұмат берді.
Осыдан кейін қала әкімінің есебіне жиналған қоғамдық кеңес мүшелері қысқы мезгілдегі көшелерді қардан тазалау, тағы басқа бірқатар мәселелер төңірегінде ой өрбітті.
Әлібек КЕМЕЛХАН, «Семей таңы»{jcomments off}
