Соңғы тәуліктерде өңіріміздегі ауа райына байланысты орын алған ахуал семейлік жастарды бірлесіп жұмыс жүргізуге жұмылдырды. Жуырда Семей қаласының колледждері мен жоғары оқу орындарының студенттері қолдарына күрек алып, қаланың мәдени нысандарының маңайын қардан тазарту акциясын бастады. Мәселен, аталмыш шараның алғашқы күнінде Абай ескерткіші орын тепкен алаң аумағын қардан тазартуға 50-ге жуық ерікті шықты.
Айта кетерлігі сол, еріктілер мұндай шараларға бірінші рет қатысып отырған жоқ. Мәселен, қаламыздағы радиотехника және байланыс колледжінің бірінші курс студенті Никита Гутов маңызды нысандардың маңайын қардан тазартуға үнемі көмектесіп келеді. Жас жігіт аталған акция туралы біле сала оны қолдауға бірден шешім қабылдапты.
— Бүгін біздің колледжде қаладағы Абай ескерткішінің маңайындағы аумақты қардан тазартуға кімнің ерікті ретінде көмектескісі келетінін сұрады. Көпшілігіміз бірден келісім беріп, қар тазалауға шықтық, — дейді ерікті.
Ерекше акцияның аясында еріктілер ескерткіш жанындағы қарды тазалап қана қоймай, Шығыс кентінде тұратын жалғыз басты зейнеткерлердің де аулаларын тазартуға көмектесті. Семейдегі акцияның бастамашылары Жастар ресурстық орталығының белсенді өкілдері болып отыр.
– Қазіргі күндері Семей қалалық Жастар ресурстық орталығының бастамасымен шаһарымыздағы мәдени маңызы бар орындарды қардан тазарту бойынша акция өткізілуде. Сонымен бірге еріктілер жалғыз басты қарттардың үйлеріне барып, аулаларындағы қарды шығаруға көмектеседі. Ескерткіштің жанындағы қарды тазалағаннан кейін біз Шығыс кентіне барамыз. Біз колледждер мен жоғары оқу орындарына қоңырау шалып, осы игі шараға қатысуға шақырдық. Сонымен, бүгін акциямызға 30-ға жуық ерікті қатысып отыр, — дейді ұйымдастырушылардың бірі Фариза Оңғарова.
Семейлік еріктілер атап өткендей, бұл акция жалғасын табады. Келесі жолы еріктілер басқа да мәдени орындардың аумағын қардан тазартады.
«СТ» — ақпарат{jcomments off}