Осы жылдың қаңтар айынан бастап «Қарағайлы» шипажайында тәуліктік және күндізгі стационар жағдайында медициналық оңалту төсектері іске қосылды.
Инсульт, жүрек соғысы, жарақат және күрделі операцияларды бастан кешірген науқастарды оңалтудың үшінші кезеңі мұнда толықтай тегін жүзеге асырылады. Оңалтудан өту үшін пациетте жергілікті дәрігердің жолдамасы болуы керек. Егер бұрын оңалтуды мұнда тек зейнеткерлер мен мүгедектер ала алса, енді міндетті әлеуметтік медициналық сақтандыру жүйесінде сақтандырылған барлық жастағы науқастар оңалту қызметін ала алады.
Алайда оңалту саласындағы жаңалықтар туралы көп адамдар біле бермейді, сондықтан науқастардың көпшілігі жедел медициналық жәрдем ауруханасынан босатылғаннан кейін қалпына келтіру процедураларын тоқтатады. Ал ДДҰ сарапшыларының пікірінше, оңалтудың маңыздылығы зор, өйткені осы кезеңде адамның толыққанды өмірге оралуы үшін ағзалардың жұмысы мүмкіндігінше қалпына келтірілуі керек.
Қалалық ауруханалардың дәрігерлері оңалтудың маңыздылығы туралы халықты хабардар ету үшін «Қарағайлыға» барып, шипажайдың жағдайымен танысты. Сонымен бірге жиын өткізіп, науқасты оңалтуға жіберген кезде пайда болатын техникалық мәселелерді талқылады.
— Үшінші кезеңге мемлекеттік тапсырысты қаламыздың көптеген мекемелері ие болды, олардың бірі — «Қарағайлы» шипажайы. Өйткені, біріншіден, олар көптеген жылдар бойы науқастарды сауықтырумен айналысып жүр. Сонымен бірге мұндағы ауа өте таза, пациенттерді оңалту үшін бұл өте қажет. Бұл біз үшін өте маңызды, өйткені жылына 1000-нан астам инсульт пайда болады және науқастардың бәрі бірдей сауығып кетпей, кейде қайғылы оқиға орын алады. Сондықтан пациенттерге оңалтудың маңызды екенін айтқымыз келеді, — дейді Семей қалалық денсаулық сақтау басқармасының бас дәрігері Татьяна Свичич.
Бүгінгі таңда шипажайда 48 тәуліктік және 30 күндізгі стационарлық төсектер бар. Шипажайда ақысыз оңалту алу үшін, дәрігердің жолдауынан басқа, емделушінің жеке куәлігі қажет және міндетті әлеуметтік медициналық сақтандыру жүйесінде сақтандырылған болуы керек.
Семей қаласының ақпараттық орталығы{jcomments off}
