Ақынның 175 жылдық мерейтойы аясында қаладағы 56 мектептің оқушыларына ойшыл, хакім Абайдың шығармаларын оқып, терең түсінулеріне үлкен мүмкіндік беретін «Абай әлеміне саяхат» клубтары ашылды.
Клуб жетекшілерінің мақсаты – Абай шығармалары арқылы жас ұрпақтың бойында еліне, жеріне деген сүйіспеншілік сезімдерін дамыту. «Абай әлеміне саяхат» жастардың бойына ұлттық бірегейлікті саналы түрде сіңіруге ықпал етеді, яғни, ең алдымен, халқын сүюге, ана тілін білуге, ұлттық дәстүрлерді бар сана-сезімімен қабылдауға, құрметтеуге тәрбиелеу, ұлттық сана жайлы түсінік қалыптастыру.
Абай Құнанбайұлының шығарма-шылық мұрасы — Ұлы даланың құпиясын қойнына басқан баға жетпес қазынамыз. Клуб мүшелері Абай өлеңдерінен 70 сөз, қара сөздерінен 45 ой-тұжырымды жатқа білулері тиіс.
«Абай әлеміне саяхат» клубы өткен жылдың 20 қарашасы күні Т.Аманов атындағы орта мектепте ашылғанын айта кету керек. Аталған мектепте «Абай деп соққан жүректер» деген атпен қалалық семинар өткен еді. Семинарға қала мектептерінің мұғалімдері, ата-аналар, барлық оқу ордалары директорларының орынбасарлары қатысты. Кездесуде «Мен бір жұмбақ адаммын, оны да ойла» тақырыбымен шеберлік сағаты, «Ақынның қара сөзі — жеке тұлғаның қалыптасуындағы жолбасшы» атты Абай әлеміне терең бойлауға бағытталған жобалық оқу өткен. Сол басқосуда Абайдың әдеби-мемориалдық музейі және Абай атындағы кітапхана «Абай — дана, дара тұлға» атты экспозиция ұсынды.
Бүгінде «Абай әлеміне саяхат» клубы мүшелерінің саны күн сайын артып келеді. Абай еңбектеріне деген қызығушылық тек мұнымен ғана шектеліп қалмақ емес. Шығыс Қазақстан облысы оқу орындарында «Абайтану» курстары енгізілді. Ақынның туғанына 175 жыл толу мерейтойын өткізу жөніндегі қоғамдық кеңестің отырысында 10 қаңтардан бастап облыс мектептерінің 5-8 сыныптары, колледждердің «Қазақ тілі мен әдебиеті мұғалімі» мамандығы бойынша оқып жатқан бірінші курс студенттері үшін «Абайтану» элективті курстары енгізілген. Облыстың 277 мектебі мен екі педагогикалық колледжінде «Абайтану» кабинеттері ашылды.
Айта кетсек, «Абай әлемі» әдеби жобасын іске асыру жалғасуда, қазақ жазушыларының шығармалары енген қазақ, ағылшын, орыс тілдерінде шығатын жиыны 21 мың данамен тарайтын 20 кітаптың тізімі бекітілді. Облысымызда өткізілетін 500-ге жуық, шетелдерде — Ұлыбританияда, Ресейде, Түркияда, Польшада, Қытайда өткізілетін жиырмаға жуық халықаралық шараларды ұйымдастыруға өңірдегі ЖОО, ғылыми және мәдени ұйымдар, ҚР Жазушылар мен Суретшілер одағы, ҮЕҰ, жастар тартылады.
Жалпы, жас ұрпақты рухани-адам-гершілікке тәрбиелеуге бағытталған ұлы ақынның 175 жылдығы аясындағы шаралардың барлығы да, бір ғасыр өтсе де, Абай Құнанбаевтың еңбектері өз құндылығы мен өзектілігін жоғалтпағанын, адамзат өркениетінің шамшырағы болып жасай беретін аса құнды мәдени мұра екенін айқындай түспек.
Семей қаласының ақпараттық орталығы{jcomments off}
