Өткен апта соңында Семей қаласындағы облыстық тарихи-өлкетану музейінде Абай Құнанбайұлының 175 жылдығына орай және мемлекеттік «Рухани жаңғыру» бағдарламасы аясында «Өнер саңлақтары» атты танымдық-тағылымдық кеш ұйымдасты-рылып, көрме ашылды.
Аталмыш шара өскелең ұрпаққа жерлес өнерпаздар, елімізге танымал сахна саңлақтары, театр әлемінің тарландары Күләш Сәкиева, Нүриден Атаханов, Халекет Ешмұратовтардың шығармашылығы мен өнегелі істерін насихаттау, олардың артына қалдырған рухани дүниелері арқылы оқушы жастарға тәлім-тәрбие беру мақсатында ұйымдастырылды. Сонымен қатар студенттер қауымын бүкіл қазақ театры өнерінің қара шаңырағы саналатын Семейдегі Абай атындағы қазақ музыкалық-драма театрында еңбек еткен артистердің өмір жолымен таныстыруды да көздеген еді ұйымдастырушылар.
Мәдени шараға театр тарлан-дарының әріптестері мен ізбасарлары, замандастары, қаланың зиялы қауым өкілдері, студент жастар мен жергілікті БАҚ өкілдері шақырылды.
Жиынның кіріспесін алғы сөзбен ашқан мұражай басшысы Қайрат Сабырбай осынау басқосудың маңыз-дылығына тоқталып өтіп, сөз кезегін кеш қонақтарына берді.
Жиын барысында халық әртісі, Семей қаласының Құрметті азаматы Бекен Имаханов сахна тарландары жайында сөз өрбітіп, олардың театр әлеміндегі алар орны жайында кеңінен айтып өтті.
Қазақстанның мәдениет қайраткері, халықаралық «Абай» қорының президенті Отантай Кәрібжанов та студенттер алдында өнер саңлақтары туралы естеліктер айтты. Абай театрын 20 жыл басқарған О.Кәрібжанов театр әлемінің бірегей тұлғаларының көп жақсылықтарын да көрген екен.
Кеш барысында Күләш Сәкиева, Нүриден Атаханов, Қалекет Ешмұ-ратовтардың көзін көрген өзге де аға буын өкілдері естеліктерімен бөлісті.
Шара аясында театр тарлан-дарының болашақ ізбасарлары – Мұқан Төлебаев атындағы музыкалық колледжде актер мамандығы бойынша білім алып жатқан жас өнерпаздардың әдеби композициясы ұсынылып, әр жылдардан сыр шертетін фотосуреттерден әзірленген көрме ұйымдастырылды.
Абай театрының артистері оркестрдің сүйемелдеуімен «Есіңде бар ма жас күнің?, «Таң самалым» әндерін орындады.
Мәдени шара «Өнер саңлақ-тары» көрмесіне ұласып, театр тарландарының фотосуреттері, сах-налық киімдері мен жеке заттары көрсетілді. Музей қызметкерлері шараға қатысушыларды жерлестерінің өнерге келу тарихымен, шығармашылық жолдарымен таныстырды.
Аталған көрмеге музей қорынан жалпы саны 107 жәдігер қойылды.
Әлібек КЕМЕЛХАН, «Семей таңы»
{jcomments off}
