13 ақпан күні қалалық орталық кітапханада «Қазақстанның 100 жаңа есімі» жобасының жеңімпазы, жерлесіміз, «Шығыс» өңірлік қолбасшылығының әскери қызметшісі Қуандық Қанатовпен кездесу кеші өтті. «Ердің ерлігі» атты кездесу кешіне отставкадағы полковник, бірнеше кітаптың авторы Шаймардан Қалиақпаров, Семей өңірі гарнизоны әскери полиция жасағының қызметкерлер құрамы, №36803 әскери бөлім сарбаздары, Орталық саябақтың қызметкерлері, Радиотехника және байланыс колледжі мен М.Төлебаев атындағы музыкалық колледждің студенттері қатысты.
Елбасының «Рухани жаңғыру» бағ-дарламалық мақаласынан туындаған «Қазақстанның жаңа есімдері» жобасы білім-ғылымы толысқан, үздік маманды, нағыз үлгі боларлық жастарды көпшілікке насихаттайтын айтулы жобалардың біріне айналды. Жуырда жобаның үшінші кезеңі аяқталып, халықтың дауыс беруімен Шығыс Қазақстан облысы атынан қатысқан үш жеңімпаз анықталды. Олар: Семей қаласындағы «Шығыс» өңірлік қолбасшылығының әскери қызметшісі Қуандық Қанатов, Семей қаласының тумасы Ержан Омарханов және Өскемен қаласындағы «Perfomance» арт-студиясының жетекшісі Ольга Чавкина.
— Қазақстанның әрбір жетістігінің тарихы, әрбір жеке адамның жетістігімен байланысты. Тарихты адамдар жасайды. «Қазақстанның 100 жаңа есімі» жобасы ең алдымен жастарға арналған. Бұл жоба аясында біз ерекше талантты, табысты жастарды анықтай аламыз, -деді Шаймардан Қалиақпаров. — «Шығыс» өңірлік қолбасшылығының Семей қаласындағы Батыс әскери қалашығының 35411 әскери бөлімінің қызметшісі — ефрейтор Қуандық Қанатов 2019 жылдың ақпан айында отқа оранған жатақхананың тұрғындарын эвакуациялауға қатысты. Ол өрт қауіпсіздігі бойынша алған біліктілігінің арқасында құтқарушылар келгенше 15 адамның өмірін сақтап қалды. Осы батырлығы үшін «Ерлігі үшін» медалімен, Қазақстан Республикасының Қорғаныс министрінің алғыс хатымен марапатталды. Қуандықтың ерлігі — жастарға үлгі.
— Мен Қуандық ағамыздың ерлігіне тәнті болдым. Ағамыз осы ісімен бізге үлгі көрсетіп отыр. Кештен жақсы әсер алдық. Ержүрек болу, елін қорғау – әрбір ер-азаматтың парызы, — дейді студент Әлібек Әбдірахимов.
Кездесу барысында Қуандық Қанатов өз қызметі және болашаққа құрған жоспарлары жайлы әңгімеледі, сондай-ақ жастарды белсенді өмір сүруге, адамдарға қамқор болып, жақсылық жасауға шақырып, мақсаттарына жетуге ынталандырды. Кездесуге қатысқан жастар өздерін қызықтырған сұрақтарын қойып, тұшымды жауаптар алды.
«100 жаңа есім» жобасының жеңімпазы, Семей қаласының тумасы Ержан Омарханов та автобуста орын алған өрт оқиғасы кезінде 48 адамның өмірін сақтап қалған болатын.
Жадыра ТӨЛЕГЕНҚЫЗЫ, «Семей таңы»{jcomments off}
