Дүйсенбі, 17 ақпан күні қалалық әкімдік қызметкерлері жергілікті БАҚ өкілдерімен бірлесе №35 бағыттағы автобустағы жолаушылар ағынын тексеру мақса-тында рейд ұйымдастырды.
Семей қаласындағы қоғамдық көліктерге дифференциалды тарифтің енгізілгеніне 20 ақпан күні бір ай болады. Осыған орай қалалық әкімдік бір айдың қорытындысын шығармақ. Яғни қоғамдық көліктердегі белгілі бір уақыт аралығындағы жолаушылар саны анықталмақ.
— Семей қаласындағы қоғамдық көліктерге дифференциалды тарифтің енгізілгеніне 20 ақпан күні бір ай толады. Біз электронды билет жүйесі арқылы қоғамдық көліктердегі бір күндік жолаушылар санын анықтай аламыз. Бірақ жолаушылар санын уақыт бойынша біле алмаймыз. Себебі электронды картадағы ақша бір-екі сағаттан соң алынуы мүмкін. Таңғы және кешкі уақытта жолаушылар саны өте көп болғанымен, сағат 10.00-16.00 аралығында жолаушылар ағыны біршама азаяды. Бүгінгі рейдіміздің мақсаты – күндізгі уақыттағы жолаушылар санын анықтап, автобустардың тиімділігін арттыру, — дейді қалалық ішкі саясат бөлімінің басшысы Нұржан Есенжолов.
Нұржан Ерғалиұлының сөзінше, тасымалдаушылардан, дәлірек айтқанда №35 бағыттағы автобус иелерінен күндізгі уақыттағы жолаушылар санының аздығына байланысты шағым түскен. Таймас және туберкулез диспансері аралығын байланыстыратын №35 бағыттағы қоғамдық көлік қаладағы үлкен класты автобустардың бірі саналады. Себебі жолаушылар санының көптігіне байланысты көлік көлемі ұлғайтылған болатын. Қазір бұл автобустарда жолаушылар санын жазып отыратын арнайы адамдар жұмыс істеуде. Бірақ, рейд барысында анықталғандай, сағат 11.00-де «Жастар сарайы» аялдамасына тоқтаған №35 автобус жолаушыларға лық толы болды.
— Тасымалдаушылар шеткері аудандардағы аялдамаларда жолаушылардың аздығын айтып, автобус қозғалысының тиімділігін арттыруды сұрауда. Осыған орай №35 бағыттағы үлкен класты автобусты таңғы және кешкі уақыттарда ғана шығарып, өзге аралықта орта кластағы автобустарды шығаруды жоспарлап отырмыз. Сонымен қатар қазір қала әкімі Ермак Сәлімовтің тапсырмасымен, қалалық әкімдік қызметкерлері, бөлім басшылары жұмысқа қоғамдық көлікпен келуде. Бөлім басшылары автобустарда туындаған қиындықтар туралы әкімге баяндап, ұсыныстарын жеткізуде,- дейді Н.Есенжолов.
Түскі уақыттағы қоғамдық көлік қозғалысы да реттелуде.
— ҚР Еңбек кодексіне сәйкес, автобус жүргізушілері мен кондукторлар түскі үзілісте 40-45 минут демалуға құқылы. Қазір 12.00-14.00 аралығында қаладағы қоғамдық көліктер 50/50 қағидатымен жұмыс істеуде. Бірақ бұл халыққа тиімсіз. Сондықтан түскі үзілісті әдеттегіден ерте бастауды ұйымдастырып жатырмыз. Түскі ас үшін бір-екі автобус қана желіден шығып отыратын болады. Барлық мәселелер біртіндеп шешіледі,- деді Н.Есенжолов.
Айтолқын САМАТОВА, «Семей таңы»{jcomments off}
