Өткен сенбі, ақпан айының 15-і күні Семей қаласының Достық үйінде, жылдағы дәстүрге сай, Бал мерекесі болып өтті. Аталмыш іс-шараны Орыс әлеуметтік-мәдени орталығы, «ЛАД» республикалық славян қозғалысы» қоғамдық бірлестігі, Семей қалалық Казак этномәдени орталығы ұйымдастырды. Сонымен қатар П.Г.Сердюк басқаратын қалалық омарташылар қоғамы да ұйытқы болыпты.
Мән-маңыздылығы жоғары бұл дәстүрлі мереке ортақ шаңырақты мекендейтін Қазақстандағы барлық ұлттар мен ұлыстардың дәстүрлерін насихаттау, жұртшылықты, әсіресе жастарды салауатты өмір салтын ұстануға баулу, түрлі ұлттар мен этностар арасындағы достық қарым-қатынасты нығайту мақсатында өткізіледі. Сондықтан да болар, аталған шараға қалалықтар көп жиналды.
— Қыс аяқталар шақта табиғат оянып, адам бойындағы барша қасиеттер де ерекше көрініс береді, адамдар өзара ізгілікті қарым-қатынас жасауға ұмтылады. Барлық халықтарда осындай түсінік, ұғым бар. Бұл — адам даналығының жазылмаған заңы. Сол себепті де осы мерекені бірлесіп өткізуді ұйғардық, — дейді ұйымдастырушылар.
Достық үйінің өкілдері Бал мерекесіне келген қонақтарға түрлі тәтті тағамдар — бал, пряниктер мен шай ұсынды.
Ал балалар үшін шеберлік сағаттары ұйымдастырылды.
Дегенмен мереке күнгі ең басты сый — түрлі бал мен омарта өнімдері қалалықтарға базар бағасынан әлдеқайда төмен бағамен ұсынылды. Мерекеге келген тұрғындардың барлығы ұзақ қыстан кейін адам ағзасы өте қажет ететін бал мен ара шаруашылығы өнімдерінен көптеп сатып алды.
Өңіріміздің әйгілі омарташылары келгендерге қандай балдың дәрулік қасиеті бар екенін түсіндіріп, өз өнімдерін жарнамалап та жатты.
Мұнымен қоса қонақтар үшін ардагерлердің халық хоры, «Истоки» халықтық вокалдық-хор ұжымы мерекелік бағдарлама әзірлепті. Шара барысында өнерпаздар әр ұлттың әндерін айтып, билерін биледі.
Азамат ЕРСАЙЫН, «Семей таңы»{jcomments off}
