Қазақстан Республикасының Президенті Қасым-Жомарт Тоқаевтың Германияға жұмыс сапары сәтті аяқталды. Мемлекет басшысы Қауіпсіздік жөніндегі 56-шы Мюнхен конференциясының ресми ашылу рәсіміне қатысып, панельдік пікірталаста өңірлік қауіпсіздік мәселесі бойынша «Географиялық орналасудың маңызы: Орталық Азия туралы әңгіме» тақырыбында сөз сөйлеп, өңірлік және жаһандық қауіпсіздікті қамтамасыз ету жайлы ой-пікірін ортаға салды.
Мемлекет басшысы Германияның ірі компаниялары басшыларымен екі жақты кездесулер өткізді.
Германияның ірі ауыл шаруашылығы компаниясының басшысы Клаус Лутцпен болған кездесуде энергия көздерін қайта қалпына келтіру және агроөнеркәсіп кешенін цифрландыру салалары бойынша бірлескен инвестициялық жобаларды жүзеге асырудың болашағы талқыланды.
Мемлекет басшысы кәсіпкердің назарын еліміздегі энергия көздерін қайта қалпына келтіру және тыңайтқыштар өндіру бағытының әлеуетін арттырудың маңыздылығына аударды.
Қасым-Жомарт Тоқаев Канаданың Премьер-министрі Джастин Трюдомен де кездесті. Тараптар Қазақстан мен Канада арасындағы сауда-экономикалық, инвестициялық және мәдени-гуманитарлық ынтымақтастықтың қазіргі ахуалы мен перспективаларын талқылап, халықаралық ұйымдар аясындағы ықпалдастықты қарастырды, өзекті мәселелер бойынша пікір алмасты.
Қауіпсіздік жөніндегі 56-шы Мюнхен конференциясының күн тәртібінде әлемдік дамудың және жаһандық қауіпсіздіктің өзекті мәселелері қарастырылды. Конференцияға қатысушылар сауда соғыстары мен санкциялардың проблемалары, Таяу Шығыстағы ахуал, Еуропалық Одақ, АҚШ, Ресей, Қытай және басқа да елдермен арадағы өзара қатынастарды, Еуропадағы қауіпсіздіктің сын-қатерлері, Еуропалық Одақ пен НАТО-ның келешегі, сондай-ақ киберқауіпсіздік пен денсаулық сақтау салаларындағы қазіргі заманның қауіп-қатерлері, жалған ақпараттарға тосқауыл қою және басқа да мәселелерді талқылады.
Бұл сапар Президентіміздің халықаралық қатынастағы беделді тұлға екенін тағы бір дәлелдеді.
Жадыра ТӨЛЕГЕНҚЫЗЫ, «Семей таңы»{jcomments off}
